Paghandum og kausaban

Pipila ka adlaw gikan karon mosulod na ang bag-ong tuig. Sa sunod tuig, daghan unya ang mahitabo dinhi sa nasud. Usa na niini ang pagpahigayon sa presidential elections sa Mayo 10.

Kini nagkahulogan nga aduna kitay bag-ong presidente sugod sa Hulyo. Ug manghinaut lamang kita nga mas pakusgan pa sa sunod nga administrasyon ang paningkamot aron samot nga moasenso ang nasud.

Kay naghinapos na man ang tuig, panahon usab karon sa mga New Year’s resolution. Matag usa kanato aduna siguroy saad sa kaugalingon nga pagbag-o sa sunod tuig.

 Siguro daghan kanato ang mosaad nga magbag-o na sa ilang kaugalingon sama sa pagbiya og inom, panigarilyo ug uban pa nga matang sa bisyo. Daghan usab ang mosaad nga magtinarong na sa ilang mga trabaho ug pag-usab sa ilang dili maayong batasan.

Sama sa usa ka dugay nang panultihon nga ang bag-ong tuig, panahon usab sa pagbag-o sa kaugalingon ug batasan. Apan dili lamang kana maoy atong handumon. Daghan kanato ang naghandum og kabag-ohan sa uban pang aspeto sa atong pagkinabuhi.

Sama pananglitan sa atong pangandoy nga makabaton og hamugaway nga pamuyo. Siguro mayoridad kanatong ania sa middle class ang maghandom gayud og maayong pamuyo. Ilabina gayud niadtong walay kaugalingong balay ug nangabang lamang sama kanako.

Aw, hinuon moabot ra gayud ang panahon sa pag-asenso. Dili sa tanang panahon nga ania kita sa ubos. Bitaw, basta maningkamot lamang, walay babag ngadto sa pag-asenso.

Kay nahisgutan lang naman nato ang pulitika, hinaut unta nga mahimong malinawon ang piniliay sa sunod tuig. Labaw sa tanan, hinaut usab nga ang mga mapiling bag-ong lider sa nasud dili na malambigit sa mga anomaliya nga maghatag lamang og lama sa imahe sa nasud.

Grabe’ng kontrobersiya ang nalambigitan niining kasamtangang administrasyon. Sukad pa sa “Hello Garci Scandal” hangtud na sa kontrobersiya sa ZTE broadband agreement, ang Arroyo administration maoy usa sa labing baho nga gobiyerno sa kasaysayan sa Pilipinas.

Hinuon dili man malabwan sa rehime’ng Arroyo ang administrasyong Marcos ug Estrada, apan ang mga kontrobersiya nga nalambigitan sa kasamtangang gobiyerno dako usab ug epekto sa imahe sa nasud taliwala sa internasyonal nga komunidad.

Apan dili man usab puro lamang kontrobersiya ang naglikos sa administrasyon ni Presidente Gloria Macapagal Arroyo. Miani usab kini og maayong bunga kon ang aspeto sa ekonomiya ang hisgutan.

Dili gayud ikalimod sa mga kritiko ni Presidente Arroyo nga milambo gayud ang atong ekonomiya ilalum sa iyang termino.

 Sa iyang pamunoan, dili malalis nga misulbong gayud ang ekonomiya. Gani kaniadtong 2007, ang ekonomiya mitubo og 7.1 percent, ang ilabing dako sulod sa 30 ka tuig.

 Kana maoy usa sa iyang maayong kabilin inig pahawa na niya sa puwesto. Ug dili kana makuwestiyon tungod kay klaro man usab nga milambo ang ekonomiya sa nasud sa iyang pamunoan.

 Bisan kon bali-balihon pa ang rekord, dili usab ikalimod nga nahimong attractive ang Pilipinas sa mga mamuhonan, langyaw man o local, ilalum sa iyang pamunoan. Ug miresulta kini sa mga nagsulbong nga negosyo sa information technology, ilabina na sa business outsourcing process.

 Apan sa kinatibuk-an, mayoridad sa mga Pilipino ang wala gayud matagbaw sa administrasyong Arroyo. Kini kon corruption na gani ang hisgutan. Sa laktud nga pagkasulti, palpak ug wala makapasar ang kasamtangang gobiyerno sa natad sa moralidad.

 Ug angay kini nga mausab sa sunod nga administrasyon. Bisan kinsa pa man ang sunod nga mokupot sa renda sa pangagamhanan.

* * *

Email: [email protected]