Ang politika ni Tomas

Pila na lang ka adlaw mahatagan na gayod og katumanan ang pangandoy sa mga taga sitio Banawa ug Inglis nga mabuwag sa ilang inahan nga barangay, ang Barangay Guadalupe. Kini human lagda-i sa kongreso ang balaudnon nga nagbuwag sa nahisgutang sitio. Matud pa ni Kongresista Tony Cuenco nga maoy amahan sa maong balaudnon, pirma na lang sa pangulo ang kuwang, itakda na unya ang plebisito.

Dugay ra untang gitakda ang plebisito sa pagbuwag sa Banawa-Inglis gikan sa Barangay Guadalupe apan gikatulgan ra kini sa kagamhanan ni Mayor Tomas Oemeña. Kon wa pa mo malimot, si Konsehal Mike Rama ug Ronald Cuenco mipalabang og ordinansa nga nagbuwag sa Banawa-Inglis gikan sa Barangay Guadalupe. Human lagda-i ang ordinansa gitakda na unta ang pagpahigayon sa plebisito kaniadto pang Mayo 6, 2000 apan giuswag kini pagka Mayo 6, 2002 tungod sa hugot nga pagsupak sa mga opisyales sa Barangay Guadalupe pinangulohan sa kaalyado ni Mayor Tomas Osmeña nga si Kapitan Faelnar.

Daw nahilis sama sa bula ang paglaum sa mga taga Banawa-Inglis nga mabuwag sa Guadalupe dihang nagsumpaki si Mayor Tomas Osmeña ug Kongresista Tony Cuenco. Tungod sa bangi wa na maglaraw si Tomas nga ipadayon pa ang proyekto ni Tony. Apan gigamit usab ni Tony ang iyang gahom sa ubos balay balauranan, didto iyang gipalabang ug giuyonan ang balaudnon nga nagbuwag sa Banawa-Inglis gikan sa Guadalupe. Miuyon usab niini ang Senado maong ang lagda na lang sa pangulo ang kuwang og magplebisito na labing seguro sa buwan sa Enero, 2010.

Si Tomas nga mikandidato sa pagka kongresista sa South district diin nahimutang ang Banawa-Inglis, Guadalupe misakay ug nagpa-front seat na. Iyang giingon nga ang dapat dili lang duha kon dili tulo gayod ka barangay ang umolon gikan sa Guadalupe ug kini mahitabo kun siya ilang botaran sa pagka kongresista.

Maro o marunong gyod ni si Tomas. Abi kay mamilegro ang iyang kandidatora tungod sa iyang pagsalikway sa gipangayo sa mga taga Banawa-Inglis gusto na siyang mamawi pinaagi sa paglingla kanila ug paghongit sa iyang paon nga mao ang managlahing duha ka barangay gikan sa Guadalupe nga mao ang Barangay Banawa ug Barangay Inglis.

Tungod sa kahadlok nga mapildi ni Atan Guardo sa pagka kongresista napugos sa pagluhod ni Tony Cuenco si Tomas aron makuha ang suporta niini. Mao ni ang estilo sa politika ni Tomas. Pagkalooy!