Pagka-pait!

Pastilan og mahukman g’yod sa Comelec nga walay katungod ang partido Kugi Uswag Sugbo (Kusug) pagtudlo og kandidato, magtaghoy-taghoy lang si Vice Mayor Michael Rama sa pagpangampanya.

Pagka karon lang gani maisip man nga lig-on ang iyang kandidatura kon itandi ni kanhi mayor Alvin Garcia kay incumbent man si Rama, sa ato pa anaa kaniya ang gahum.

Apan alang nako, mas maayo g’yod nga dunay kontra si Rama nga “lig-on-lig-on” kay kon ang iyang mga kaatbang pulos huyang, daghang mga botante ang dili ganahan mobotar.

Sama god nako dihang nagka-atbang sila si Mayor Tomas Osmeña ug Lahug barangay captain Mary Ann de los Santos pagka mayor, wala na lang ko mobotar uy.

Ako man god nga natan-aw nga wala g’yoy dag-anan si De los Santos ni Tommy, unya sa mga konsehal ang kandidato sa oposisyon kaniadto lisud nga modaug mao nga wala na lang ko mobotar.

Karong eleksyona, akong lauman nga ang oposisyon mopaspas sa ilang pagpangampanya aron dunay molusot kanila.

Ang ako lagi nga gusto mao nga maayo g’yod nga dunay oposisyon diha sa konseho. Nindot man gani unta nga patas g’yod ang gidaghanon.

Sa ingon nga paagi, mahimong mahashasan na g’yod pag-ayo ang tanang transaksyon nga pagahimoon sa dakbayan, ilabi na ang paggasto sa mga salapi sa syudad.

Bisan kaming mga sakop sa media nga kanunay nag-cover diha sa City Hall nakabantay nga duna g’yoy mga transaksyon nga angay’ng kwestyonon, apan wala kini mahimo kay kinsa may mohimo nga pulos man sila BOPK?

* * *

Tan-aw nako, moarang-arang g’yod ang pagdumala sa Mandaue City kon si Kongresista Nerissa Soon-Ruiz maoy modaug nga mayor.

Taas na kaayo og kasinatian si Ruiz sa pagdumala sa kagamhanan mao nga nagtoo ko nga molambo ang Mandaue ubos sa iyang pagdumala.

Usa nako ka higala miingon nga ang sagad sa mga babaye maayo nga modumala sa panimalay. Bitaw, may basihanan kining maong argumento.

Dinhi hinoon sa dakbayan sa Sugbo ang maong argumento dili magamit alang ni Georgia Osmeña kay ang manghud sa mayor wala pa may kasinatian sa pagpadagan sa kagamhanan, dili sama ni Ruiz.

Mao nga diha sa Mandaue, awhagon nako si Kongresista Ruiz nga “fight” g’yod Ma’am!

* * *

Unsa ning report nga akong nadawat, ang mga tindahan diha sa Pinamungajan dili moisyu og resibo? Apil na gani kuno ang mga botika. Unsa god tawon mo, wala mo kahibalo sa balaud?

Unya, diha gihapon sa maong lungsod gisaway sa katawhan ang pamaagi nga ang midwife ra kuno ang usahay moisyu sa resita alang sa tambal kon moadto sila sa health center, bisan og anaa ang doktora.

Paita god. Tan-awa ni palihug ninyo uy. Wala ba kini mahitabo diha sa silingang lungsod sa Aloguinsan?

Alang sa mga higala nako diha sa Aloguinsan, nalipay ko kay ang suod ko nga higala nga si Greg Dealagdon, usa ka criminologist, milansar pagka mayor sa inyong dapit.

Sa among panaghinabi, nahibaw-an nako nga daghan og maayong mga plano si Greg pagpalambo sa Aloguinsan kon inyong tabangan.

* * *

Nakaagi ko og usa ka dapit diha sa barangay San Roque (Ciudad) kaniadtong miaging hapon. Nakita nako ang daghang mga tawo nga naglingkod lang daplin sa karsada, nagpalandong.

Nakahinuktok ko og naghuna-huna nga paita. Samtang wala sila’y kapoy kay walay trabaho, sigi lang lingkod huwat sa pag-abot sa gabii, apan wala sa’y kwarta. Pait!