Bida sad uy, wa gyud ta kamatikod ni Peñaflorida?

Imagine, kun wala pa ang CNN, usa ka TV network sa Amerika, hangtud karon, di gyud mamatikdan ug walay maka-notice sa “Pushcart Classroom” ni Efren Peñaflorida.

Unsaon, politika may priority ning atong nasud. Matud pa, politika maoy atong pamahaw, paniudto ug panihapon. Usahay i-midnight snacks pa.

Mao kini kita. Personal ang tanan, walay tagad kun unsay makaayo sa nasud. Maoy hinungdan nga kita ang labing kabus ning dapita sa kalibutan. Nagkapareha lang   tang tanan. Ako muna, bago bayan! Kana kun duna pay mahibilin alang sa bayan. 

Maoy hinungdan nga nagpunay kita’g pamalit og bugas gikan sa ubang kanasuran, tungod kay dili kita maka-produce og enough rice alang kanatong tanan. Kini tungod kay ang politika, nga maoy atong priority, dili man maka-produce og bugas. Di ka mauwaw ini, Dro, nga sa atong ka-bright ug kahanas mo-Iningles, magsalig sa Vietnam nga ang ilang mga mag-uuma didto di kamaong mo-Iningles? 

Sige lang tang debate, sigeng press releases, speeches, nagpunay ug nag-iyahay og akusar kinsay kawatan kinsay dili, sigeng hingilin sa atong kaigsoonan aron adto sila didto sa ubang kanasuran, mabuhi … unsaon nato pag-uswag niini?

Gumikan niini, walay nakamatikod sa gihimo ni Peñaflorida, bisan gani ang DepEd, nga sila unta ang unang mahibawo niini. Walay usang cabinet secretary, walay senador o representante, walay gobernador o mayor, labi pang walay barangay captain o tanod ang naka-notice ni Efren.

Karon nagdalidali kita’g hatag og bisag unsa na lang nga paagi sa pagpasidungog kang Efren isip bayani. Salamat sa CNN. Pastilan! Imagine, siya ang gihimo nga Hero of the Year sa CNN. Lupig gani si Obama.

Samtang usa kini ka dakung kadungganan sa atong nasud, sa samang higayon, medyo tamparos usab kini sa atong educational system sa atong nasud, nga maoy nakapaaghat ni Efren pagsagop sa “pushcart classroom.”

Gitukod ni Efren ang Dynamic Teen Co. (DTC) nga maoy nagpalakaw sa “pushcart classroom,” sa nagpanuigon pa siya’g 16. Karon, 28 yrs. old na siya. Natawo sa Cavite City, sa mga ginikanang tricycle driver ug labandera. Ikaw, Dro, duna ka pay higayon nga ma-hero, despite sa imong kawad-on.

Matud niya : “Education is an effective tool in our development, as long as we combine it with our faith in the Lord!”