Kayugot sa politika

Bag-o na ang collector sa Bureau of Customs sa Port of Cebu sugod kaniadtong adlaw’ng Martes kini human hulipi si collector Ricardo "Boysie" Belmonte sa iyang katungdanan ni Ronnie Silvestre nga gikan sa port of Davao.

 Sa iyang pagbiya, gibilin ni Boysie ang surplus sa collection nga mikantidad og 356.412 milyones ka pesos bisan wala pa matapos kining tuiga tungod kay Nobiyembre pa lang nakuha na niini ang target collection nga 5.6 bilyones ka pesos ning tuig 2009.

 Basi sa Disyembre 7 nga record ang Bureau of Customs Port of Cebu nakakolekta na og P6,019,412 bilyones. Sa miaging tuig misobra usab ang collection ni Boysie og P296.124 milyones sa P5 bilyones nga target collection. Hinuon, ang pagsubra sa collection sa Port of Cebu giabagan usab kini sa iyang lig-on nga economic team nga gilangkoban nila ni Atty. Paul Alcazaren ang deputy collector for operation, Carling Corsega, Chief of Assessment, Florante Ricarte Assistant Chief of Assessment ug uban pa.

 Tungod sa maayong performance angayan unta nga pasidunggan ug pahalipayan si Boysie Belmonte ug papadayonon sa pagpangalagad dinhi sa Port of Cebu pero patid ang iyang nadawat. Gihulipan siya sa katungdanan sa way igong hinungdan. 

 Klaro ug tataw nga politika ang hinungdan sa paghulip ni Boysie sa iyang katungdanan dinhi sa Port of Cebu. Gumikan kay igsoon niya si Quezon City Mayor Sonny Belmonte ang usa sa mga haligi sa Lakas-Kampi-CMD nga mitapon sa partido Liberal, wa na lang baliha ug tan-awa sa Malakanyang ang maayong performance ni Ricardo "Boysie" Belmonte.

 Ingon ani ka bati ang politika ni Pangulong Arroyo kay bisan unsa ka dako ang imong natampo sa iyang administrasyon dili na kini niya balihon basta tan-aw niya nga duol ka sa iyang kontra.

 Pagkaluoy tawon sa mga nagtinarong mapagan lang sa politika. Pero kun tarong pa unta ning atong pangulo dili seguro niya hulipan si Belmonte.

 Anyway, maayo na lang pag-abot dinhi sa Sugbo ni Collector Ronnie Silvestre. Ako manghinaut nga sa imong pag asumir ning imong bag-ong katungdanan mapalabwan pa nimo ang maayong performance ni collector Ricardo Belmonte.