PGMA mikakak

Wa na paabota sa Malakanyang ang hukom sa Kongreso ug Korte Suprema mahitungod sa legalidad sa gipakanaug nga balaud militar didto sa Maguindanao. Kaniadtong Sabado sa alas nueve sa gabii gilibkas sa Malakanyang ang balaud militar o martial law human sa sobra duha ka semana nga pagpatuman niini.

 Ang Malakanyang mipasabot nga ang balaud militar gilibkas tungod sa pagka kab-ot na sa mga tumong niini sama sa pagkasikop na sa mga akusado sa masaker, pagpasaka na nila og kaso, pagkapuhag na sa mga armadong tawo ug uban pa. Hinoon pabilin gihapong gipaubos sa State of Emergency ang lalawigan sa Maguindanao.

Nakasabot nang Malakanyang nga ideklarar gayod nga illegal ug unconstitutional sa Korte Suprema ang gipakanaug nga balaud militar sa Maguindanao. Bisan pa og uyonan sa Kongreso ang balaud militar, nakaong-ong gihapon sa taas nga hukmanan ang mga petisyon nga nagkwestiyon sa legalidad niini nga posibleng paboran sa mga mahistrado. Busa aron makalingkawas sa supalpal gidali ang paglibkas sa balaud militar.

Bisan kun ang akong kasing-kasing nagpaninggit sa pagpatuman sa balaud militar didto sa Maguindanao tungod sa mga lehitimong rason nga gihatag sa Malakanyang apan ang akong tanlag nagmakuli o nagdumili tungod sa kakuwang sa basihanan niini. Dili man ugod tanang lehitimong rason legal. Busa dili maayong akong piyongan ang akong tanlag ug paminawon ang singgit sa akong kasing-kasing tungod kay gusto ko gihapong ipatigbabaw ang rule of law and not of men.

Letra por letra klaro ug tataw kaayo sa atong batakang balaud nga ang balaud militar mapakanaug lamang kun adunay rebelyon ug invasion kun gikinahanglan. Ang balaud militar mapakanaug lamang kun ang rebelyon aktuwal, dili imahinasyon ug dili hulga lamang. Absoluta sententia expositore non indiget - When language of law is clear, no explanation of it is required. Busa wa na kinahanglana ang bisan unsa pang pagpasabot sa kagamhanan ni Pangulong Arroyo sa malapason sa balaud nga martial law nga gipakanaug.