Hadlok sa U.N.
Human sa walo ka adlaw nga deklarasyon sa martial law didto sa probinsiya sa Maguindanao gilibkas na ni Presidente Gloria Macapagal Arroyo ang Proclamation 1959 niadtong Sabado sa gabii.
Hingpit na kunong napuhag sa gobiyerno ang rebellion nga gipasiugdahan sa pamilyang Ampatuan human sila gitumbok nga maoy utok sa nahitabong massacre sa 57 ka mga civilian lakip na sa kapin sa 30 ka mga sakop sa media.
Tinud-anay bang napuhag na ang rebellion? Ang tinuod way rebellion nga napuhag sa deklarasyon sa martial law tungod kay sukad sa sinugdanan wa may rebellion nga gipasiugdahan ang mga Ampatuan.
Kun duna may resistance gikan sa mga Ampatuan dihang gipangdakop sila tungod sa kalambigitan sa massacre wala ni magpasabot nga rebelde sila.
Sama nga kun ang ordinaryong kriminal mosukol sa kapolisan nga modakop niya wala na magpasabot nga ang maong kriminal rebelde og mamahimo nang modeklarar ang gobiyerno og martial law. Pananglitan ang lider sa PBMA nga si Ruben Ecleo Jr. misukol sa kapolisan ug militar nga midakop niya kaniadto didto sa Dinagat Island tungod sa kasong parricide.
Atol sa maong higayon daghan ang mga namatay, apan mideklarar ba gud si Arroyo og rebellion? Susama ra man to og kahimtang kun buot hunahunaon tungod kay si Ecleo daghan pud og mga dumadapig nga pulos dunay hinagiban.
Dili rebellion sa mga Ampatuan maoy tinuod nga hinungdan sa deklarasyon sa martial law didto sa Maguindanao kon dili ang kabalaka sa presidente nga lakip siya sa manubag sa maong krimin atubangan sa international court of justice.
Nahadlok si Arroyo nga human unya sa iyang termino sa 2010 kihaan siya sa United Nations didto sa international court of justice tungod sa crime against humanity sama sa gidangatan ni kanhi Yugoslavian President Slobodan Milosevic.
Dili lisud ilambigit si Arroyo sa maong krimin tungod kay tataw nga ang responsabli iyang kaalyado sa politika. Gawas niini ang mga armas nga gigamit iya sa gobiyerno ug mga cafgu ug polis ang ubang nalambigit niini.
Sa ato pa mogawas nga dunay pagtugot sa gobiyerno ang maong krimin labi pa nga duna nay report sa sayo pa ang UN pinaagi sa ilang imbestigador nga gipadala dinhi pagsusi sa mga extra-judicial killings nga si Phillip Alston.
Sa report ni Alston iyang giingon nga dunay posibleng kalambigitan ang militar diin si Arroyo maoy commander in chief sa mga nahitabong extra judicial killings sa nasud.
Tungod niini nanagang daan si Arroyo nga dili maapiki atubangan sa UN pinaagi sa paghimo og bug-at nga lakang bisan wala na masubay sa Constitution aron pagkumbinsir nila nga wa siyay labot ug wa mokonsintir ang iyang administrasyon sa linuog nga binuhatan sa iyang mga kaalyado sa politika.
* * *
Sunod semana pasko na maong nag-anam sab kadaghan ang mga batang manaygon sa mga motorista diha sa kadalanan.
Ambot nganong gipasagdan ni sa atong mga opisyal sa dakbayan nga labihan man ka piligro niini.
Dili man tingali buta ang atong mga opisyal nga wa makakita sa mga bata nga manuktok sa mga sakyanan kay mangayo og pinaskuhan.
Maayo tingaling sundon sa dakbayan sa Sugbo ang ihemplo sa dakbayan sa Lapu-Lapu diin ilang gitigom ang mga libudsuroy nga mga bata og gidalitan sa makabuhong nga pinaskuhan.
Dalaygon ang gihimo ni Mrs. Paz Radaza sa Lapu-Lapu nga gitigom ang tanang mga street children alang sa usa ka Christmas party diin ilang natilawan ang lamiang mga pagkaon.
Tagsa ra intawon makatilaw ang maong mga bata og sama niini ug dalaygon ang usa ka lokal nga kagamhanan nga naghatag og bili bisan sa labing uyamot sa katilingban.
Busa alang ni Mrs. Radaza saludo ko nimo ug sa lokal nga kagamhanan sa Lapu-Lapu hinaut magpadayon ug managhan ang mga opisyal nga dunay pagbati sa mga kabus nga kabataan.
* * *
- Latest
- Trending
