EDITORYAL - Halad 2010 gipangandaman na

Samtang daghan kanato ang bisi (busy) sa pagpangandam sa umaabot nga eleksiyon, naa say pipila ka sakop sa atong komunidad nga bisi usab sa pagpreparar alang sa usa ka kalihukan nga dunay kalabutan sa atong kultura.

Gipangandaman na ang Halad 2010. Usa kini ka lahi nga presentasyon diin ipasundayag ang Kinaiyang Sugbuanon isip kabahin sa pagpreserbar ug paghatag og bag-ong kinabuhi sa mga kabilin nga Sugbuanon nga hapit nang nalimtan gumikan sa pagsulbong sa ilang gitawag nga modern age.

Ang Halad 2010 (Halad Kultura ug Kinaiyang Sugbuanon) proyekto kini ni Dr. Jose “Dodong” R. Gullas sa University of the Visayas ug tsirman sa The Freeman-Banat News.

Atol niining pasundayag, hatagan og pasidungog kadtong mga Sugbuanon nga nakapalambo sa Sugbuanong kanta/musika.

Sa miaging duha ka Halad ang gihataga’g pasidungog mao sila si Ben Zubiri, Vicente Rubi, Maning Velez, Minggoy Lopez ug uban pa.