Si Rica, si Rocky ug ang ladlad

Niadtong miaging duha ka semana, dihay pipila ka higayon nga nakalili intawon ko sa akong telebisyon nga walay gamit-gamit tungod kay nagtudlo man lagi ko sa gabii sa kursong abogasiya. Usa sa mga salida sa lawom nang gabii mao kining Pinoy Big Brother.

Alang niadtong nagsubay sa maong salida sa telebisyon, siguradong nakaila mo kun kinsa ni sila si Rica ug si Rocky. Puros sila mga housemates. Si Rica usa ka transgender o gipakatawong lalaki nga karon babaye na ang hitsura. Si Rocky, sa laing bahin, na-isyu tungod sa mga gibungat niini nga mga komentaryo nga nakapasuko sa asosasyon sa mga transgender tungod kay sa ilang tan-aw, nagpakita kini sa diskriminasyon batok sa mga mahuyang o gay.

Dili lang usab dugay nga na-isyu kining desisyon sa COMELEC nga nag-disqualify isip party-list sa grupo nga Ang Ladlad nga gisakpan sa mga mahuyang nga nagparehistro unta aron maoy modala sa tingog sa mga mahuyang didto sa kongreso, kay sigun pa nila, kulang sila sa proteksyon sa balaod batok sa diskriminasyon sa sosyidad.

Bisan kun daghang mahuyang dinhi sa ato, ug bisan kun kita nakapahimulos sa ilang mga talento ug kontribusyon labi na sa natad sa arte, aduna gyud gihapoy pipila ka sektor nga motamihid sa atong mga kaigsoonang bayot. Gani, dili maihap ang mga ginikanan, labi na mga amahan, nga mosalikway sa ilang anak kun mahuyang kini. Yam-iran usab kadtong lesbian o tomboy sa pipila sa atong sosyidad.

Ngano man kini? Aduna ba sila’y gipakita nga dili maayo? Ikaw ug ako nasayod nga tinuod, adunay daghang badlongon niining mga bayot ug tomboy. Apan daghan usab kanila ang tarong. Pareha ra usab porke ma-lalaki o ma-babaye, nga adunay mga libog og ulo, aduna say tarong. Apan kasagaran nga nagtamihid sa mga bakla dili tungod kay tarong ba kini o yabag, kundili tungod lang gyud sa ilang pagkamahuyang.

Sa desisyon sa COMELEC sa kaso sa Ang Ladlad, maoy pagsabot sa pipila nga giisip niini nga depektoso ang pagka-tawo sa mga bayot. Usa kini ka dili makataronganon ug illogical nga konklusyon, ug nagpaila lamang nga judgmental pa gayud ang atong sosyidad. Dali pa gyud diay kitang mohukom sa atong isig ka ingon sa walay igo nga rason. Ang atong pagsabot sa moralidad dili pa gyud diay pinasikad sa rason, o sa gibuhat o wala buhata, kundili pinasikad pa sa atong mga biases.

Ang diskriminasyon sa isig katawo usa ka timailhan sa kawalay respeto, pagka-ipokrito, o pagka-hagip-ot og salabutan. Kun aduna pay daghang diskriminasyon dinhi sa atoa, magpabilin pa kita sa dark ages, ug lisud pa gyud natong makab-ot ang kaangayan sa sosyidad.

* * *

Alang sa inyong mga panahom, palihug email sa [email protected]. Daghang salamat.