Mga dispatser sa Pier 1

Tungod sa masaker sa Maguindanao, nasentro atong atensiyon sa maong lalawigan.

Kun hisgutan ang private army, ang mga Ampatuan dayon ang mosangtop sa atong hunahuna. Apan ‘unfair’ kini alang sa mga Ampatuan.

Nasayod na kitang daan nga dili lamang ang mga Ampatuan ang nagtiner og private army. Ang mga Mangudadatu kaha?

Ang akong punto mao nga ang kagamhanan angayang walay pilion. Ilhon nila ang mga political lord ug mga warlord sa Mindanao -– sa kinatibuk-ang Mindanao, dili lang sa Maguindanao -– aron mapatuman ang pag-disarma sa mga civilian volunteer organization (CVO) nga gihimong goons ug private army sa mga politiko.

Dili lamang ang mga politiko nga mga Muslim ang naghimo niini. Adunay mga Kristiyano nga mga politiko nga dayag usab nga naghupot og daghang mga armas ug nagbuhi og mga armadong goons, apan wala lamang malingii sa kagamhanan tungod kay ang atong mga mata naka-focus ngadto sa mga Ampatuan.

Gani, dili lamang sa Mindanao kini nanghitabo. Niadto bitaw’ng nakalabay nga eleksiyon, didto sa northern Luzon nag-inambusay man usab ang manag-atbang nga mga kampo sa politika.

Ang akong kawsa nga kanunay nakong balikbalikon mao ang pag-angkon sa nasud og “gun-less” politics.

Diha sa politika nga walay armas maangkon nato ang tinuod nga demokrasya. Mag-unsa man ang politika nga gipa-ibabwan og armas? Magkurog ang mga tawo ug dili makapili subay sa ilang konsensiya sa tukmang kandidato. Adunay demokrasya, pero tikoy nga demokrasya.

* * *

Ang mga sakop sa media sa Manila nagpakita lamang sa ilang ka-walay batasan. Naka-ako sila sa pagtamay ug pagbato sa kanhi nila kauban nga anaa na magserbisyo sa Malacañang.

Si Press Secretary Cerge Remonde miatubang unta kanila aron paminawon ang ilang mga pamahayag atol sa ilang indignation rally aron ikondenar ang linuog nga pagpatay sa 34 ka kauban namo sa media didto sa Maguindanao.

Apan inay ilang sultian sa tarong, ila na hinuong gi-boohan si Remonde. Wala pa matagbaw, ila pa gyud nga gilabay og mga butang nga mitugpa gyud intawon sa ulo sa kalihim sa prensa.

Dili kadto buhat sa mga tarong nga tawo!

Dili hinuon nato mabasol ang ilang mga kaguol nga gibati tungod sa nahitabo sa among mga kauban.

Apan kinahanglan pa ba gyud nga magbinastos aron ipaabot ang atong mga gibating kaguol ngadto sa gobyerno?

Kinahanglan pa ba gyud diay’ng mopasakit sa kanhi kauban aron masulti ang buot nga ipaabot ngadto sa kagamhanan?

Kun mao kini, wala na kitay kalahian sa ubang grupo nga kun mag-rally, mohilak kun mamauli nga walay gubot nga nahitabo.

Makadadayeg kaayo ang gihimo ni Remonde. Nasayod siyang init ang media tungod sa insidente sa Maguindanao, apan migawas siya sa iyang opisina ug miatubang sa nagsinggit-singgit nga mga sakop sa media.

Bisan sakit ang gihimo sa mga sakop sa media, mibalik siya og sulod sa opisina nga wala gani magbaton og kayugot ug pagmando pagpa-aresto sa mga sakop sa media nga mipasakit kaniya.

* * *

Unsa man diay gihimo sa kapolisan diha sa Waterfront Police Station niining mga dispatser sa Pier 1 nga mamiktima og mga pasahero sa taxi?

Adunay reporter nga mitawag kanako kagahapon aron pagpahibalo nga nagkagrabe ang pagka-maldito sa mga dispatser sa Pier 1, nga kusog kaayong manglubag og mga pasahero.

Kining mga dispatser manugat og mga taxi nga nagdala og mga pasahero nga manakayay og barko sa Pier 1. Ang nakaparat kay sa usa ka pasahero, tagtulo o tag-upat ka dispatser ang magtabang og pangayo.

Diha kunoy usa ka pasahero nga mitunol og piso, gisagpa sa dispatser. Tingale nasuko kadto kay nganong piso ra ang gihatag. Mahal naman gud ron ang Tanduay.

Diha pud kunoy usa ka pasahero nga mitunol og singko, gihulga sa dispatser pinaagi sa pag-ingon “di nako gusto makakita sa imong nawong.”

Nanghitabo kini duol mismo sa Waterfront Police Station. Atong balikon pagpangutana: Unsa man diay gihimo sa kapolisan diha sa Waterfront Police Station batok niining mga dispatser nga anaa man kini nag-operate duol mismo sa ilang presinto?

Atong awhagon ang hepe sa Waterfront Police Station nga si Chief Insp. Aureo Sanchez. Unsa man diay gihimo ninyo diha, sir?

Ambot og nasayod ba kaha kini si Chief Insp. Sanchez nga kining dispatser gi-ban na kini dinhi sa siyudad sa Sugbo pinaagi sa usa ka ordinansa.

Dili mahimong himuong rason sa mga polis sa Waterfront Police Station nga walay reklamong naabot sa ilang buhatan mao nga wala silay aksiyon nga mahimo. Kay ang buhat mismo sa dispatser gihimo kining ilegal subay sa usa ka ordinansa.

Nganong dili man sila mamadlong?

Dili angay maghulat si Chief Insp. Sanchez nga si Cebu City Police Director Patrocinio Comendador ang momando kanila.

* * *

Tigulang na apan mosikad pa. Mao kini akong paghulagway kang Lito Osmeña kinsa nagplanong modagan pagka-senador sa nasud sa 2010 nga eleksiyon.

Kun madayon, ikaduhang Sugboanon si Lito O. kay ang igsuon ni Mayor Tomas Osmeña nga si Sergio ‘Serge’ Osmeña III mobalik man og papili pagka-senador.

Ang kasamtangang Senado karon walay Sugboanon busa wala kitay representasyon sa Senado.

Busa, maayong suportahan natong mga Sugboanon kining duha ka mga Osmeña.