Unsa, gipatiran si Odilao sa ANAD ?

Hanap kaayo ang akong nadunggan sa una nga kono gipaka-walay labut si kanhi Customs Collector Boy Odilao sa ANAD. Wala ako motuo sa akong nadunggan, tungod kay gawas nga usa siya sa nagmugna sa ANAD, suod kaayo sila si karon Congressman Jun Alcover. 

Sa kahigalaan nga akong gisuginlan mahitungod niini, walay bisag usa kanila ang mituo. Kay kinsa goy magtuo nga mao kini ang dangatan sa duha ka suod nga higala, nga sa diha nga naangkon na unta nila ang kadaugan, magkabulag na hinoon. Makapatingala ngano nga karon nahimo na hinoong liability si Odilao sa ANAD. Buot bang ipasabot nga wala makatampo si Odilao sa kadaugan karon sa ANAD ?

Sumala sa napatik sa mantalaan, ang misunderstanding sa duha, adunay kalabutan sa umaabot nga eleksyon sa party-list kay kono, dili mosugot si Odilao nga ma-third nominee. Nganong third nominee ra man ? Tungod lang kay wala siyay daghang kwarta ika-support sa galastuan sa kampanya ?

Sa akong sabut, ideology ug advocacy pagpanalipod ug pagpalig-on sa demokrasya sa atong nasud maoy gibarugan sa ANAD. Ug mao kini ang nakapaaghat ni Odilao pagpaluyo sa ANAD, hinungdan nga gibubo niya ang igong panahon, kahago, ug lagmit kapasagdan pa usahay ang pamilya, alang sa kadaugan sa ANAD.

Gani, kapasagdan usahay niya ang AFRENA (Association of Former Regional Executives of National Agencies) diin siya ang Presidente, tungod ug alang sa ANAD. Sa ato pa, tungod ug alang sa demokrasya, iyang priority ang ANAD.

Pagkakaron, wa na tay mahimo ini. Ilabina kun mao kini ang desisyon sa tanang kadagkuan sa ANAD. Ila kining prerogative. Apan, di ba Vice Chairman man si Odilao sa ANAD? Kun mao, giunsa man siya pagpalagpot sa iyang katungdanan? Nag-eleskyon ba, unya, napildi siya?

Anyway, wa na tay labut ini. Katapusan namong kita, miting sa AFRENA, wa man i-elaborate ni Odilao ang mahitungod niining nahitabo kaniya ug sa ANAD. Ang ako lang, kun madayon gyud ang pagpalagpot kaniya, makaayo ba kini sa ANAD? Advantageous ba kini sa grupo? Good riddance ba ang iyang pagka-wala? Ang mga contact ni Odilao nga nagpaluyo kaniya, magpabilin ba sa ANAD ? Mga pangutana nga sila ra ang makatubag. Ikaw, Dro, sa imong hunahuna, mahilot pa kaha ni ?