Kinabuhi ang bugti
Nagbangutan ang tibuok industriya sa media sa nasud tungod sa gidangatan sa mga inosente nga mga civilians didto sa Sharif Aguak, Maguindanao niadtong Lunes lakip niini ang mga reporters nga igo lang unta nga nag-cover sa pagdudo sa certificate of candidacy sa usa ka kandidato pagkagobernador.
Ang hitabo nakapahinumdom sa mga sakop sa media sa panultihon nga “no story is worth dying for.” Apan dunay mga panghitabo nga dili malikayan ug wa gyud paabota sama sa nahitabo niadtong Lunes.
Ang labing minus 34 ka mga reporters buot unta nga modokumento sa pagduso sa COC ni Buluan Vice Mayor Ismael Mangudadatu isip gobernador sa Maguindanao. Tungod sa kainit sa sitwasyon sa politika sa ilang dapit si Mangudadatu misugo sa iyang asawa ug sa duha niya ka mga igsuon uban sa ilang mga babaye nga mga abogado ug pipila ka mga supporters nga maoy mo-file sa COC didto sa buhatan sa Commission on Elections.
Nagtuo man gud si Mangudadatu nga dili hilabtan sa iyang mga kaatbang sa politika ang iyang asawa ug ang iyang duha ka mga igsuon tungod kay kini mga babaye ug daghan sab nga mga sakop sa media ang uban nila.
Apan way respito sa mga babaye ug sa profession sa media ang mga tawo nga nagbuhat sa linuog nga kremin. Ang kaatbang ni Mangudadatu nga si Andal Ampatuan, Jr., anak ni Governor Andal Ampatuan, Sr. maoy gitumbok sa kapolisan ug militar nga mastermind.
Gani ang ilang mga private armies nga lakip sa pipila ka mga polis ug CAFGU gidakop na kagahapong adlawa. Si Ampatuan mipadala na og surrender feelers pagsuwat nako niining maong lindog.
* * *
Ang mga reporters wala na makahimo pagreport sa estorya nga ilang gisunod ang labing subo tungod kay ang maong estorya ilang gibayran og mahal; ang ilang kaugalingong mga kinabuhi. Kun duna pay bisan usa nila ang nakalighot sa lampingasan nga mga tawo hayan ato untang masayran unsa gyuy nahitabo. Ato unta sigurong masayran tinuod bang mga polis, Cafgu ug mga private armies sa mga Ampatuan ang mibabag nila.
Masayran unta nato tinuod bang gilugos una ang mga babaye sa wala pa sila patya pinaagi sa pagpusil ug ang uban pagpaligis sa sakyanan ug ang uban giputlan pa og liog. Tungod kay way bisan usa sa mga reporters nga nabuhi ang tanan pulos nalang nato tag-an tag-an unsa gyu’y nahitabo.
* * *
Ang nahitabo sa Maguindanao naghimo na karon sa Pilipinas nga maoy labing piligro nga dapit alang sa mga sakop sa media. Gilabwan na sa Pilipinas ang Iraq tungod kay mas maayo pa didto sa panggubatan sa Iraq kay kamao pa sila nga morespito sa media isip mga non-combatants.
Didto sa Maguindanao ang mga lampingasan nga mga politiko ug ang ilang mga hinanib di gyud kamao morespito sa media ug sa mga civilians.
* * *
- Latest
- Trending
