Ang mga alibang-bang sa Politika

Dayag na kaayo ang pagpanglupad sa mga politikong alibang-bang ug ang ila nang pagbalhin-balhin ngadto sa mga nagkalain-laing partido. Ang mga politikong alibang-bang nga mga oportunista, segurista ug manipulista naniguro na sa paglupad ngadto sa mas tam-is pang partido alang sa pagpaniba.

Kasagaran sa mga namiya ug nanglupad mao ang gikan sa partidong Lakas - Kampi - CMD nga nanabok na ngadto sa partidong Liberal ug Nationalista. Ang rason sa ilang pagpanglupad klaro ug tataw - ang wa igkita nilang kandidato sa pagka presidente sa mga gipahigayong survey.

Tungod kay nanganaw-kanaw ang biya sa ilang kandidato sa pagka presidente, gibiyaan na sa mga politikong alibang-bang ang ilang partido hinungdan nga nakuhaan og lakas ug kakampi ang Lakas-Kampi-CMD.

* * *

Si Senador Loren Legarda nga nailhan sa iyang pagpakabana ug pagpanalipod sa kalikupan ug pag-atiman sa nagkausab nga klima maoy napili ni Senador Manny Villar nga iyang bise presidente sa iyang pagpapili sa pagka presidente. Si Loren Legarda usab ang mipirma sa resolution sa senado nga nagpapahawa ni Villar sa pagka presidente sa Senado. Apan tukma gayod nga usa ka tuig sa pagkanaug ni Villar sa pagka presidente sa Senado nagkuyog na sila. Si Loren upod tong naghilak-hilak atol sa impeachment trial ni Erap nga ilang gipapahawa sa Malakanyang pero pila lang ka tuig nagkuyog napod sila si Erap. Sakto si Senadora Jamby Madrigal sa iyang paghulagway ni Senadora Loren Legarda nga dali ra kaayo kining mausab sa iyang mga baruganan. Ang baroganan sa Senadora minunot sa iyang battle cry nga climate change. She changes like the climate.  

* * *

Misuki si kanhi Senador Sonny Osmeña sa pagkatudlo ni Mayor Tomas Osmeña isip chairman sa partidong Liberal sa dakbayan sa Sugbo kana gumikan kay dili kini tinuod nga Liberal. Gihinganlan sa kanhi senador ang mayor nga sip-sip ngadto ni pangulong Arroyo ug Chopsuey ang partido niining BOPK. Ang senador makigsulti ngadto sa kanhi presidente sa partidong Liberal nga si Franklin Drilon alang sa pagpaabot sa iyang reklamo.

Nakahibawo na kamo kinsa si Tomas. Unsay gusto ni Tomas kuhaon gyod niini. Apan nasayod upod kamo kinsa si Sonny Osmeña. Wa pa mawagtang sa hingpit sa kanhi senador ang iyang influencia.

Busa ang mahitabo mura niini’g bibingka nga giluto ang partidong Liberal dinhi sa dakbayan sa Sugbo. Init sa taas ug init sa ubos nga momugna og dakong liki sa partido.