Usa ka journalist kon tigbalita gidakop ug gi-detain og duha ka oras sa mga polis didto sa China di pa lang dugay. Kataw-anan ang krimen nga iyang nahimo.
* * *
Suma sa balita, ang maong tigbalita gidakop kay nagsul-ob og t-shirt nga gipatikan sa mga nawong ni US President Barack Obama ug ni Mao Tse-tung, ang gikahadlokan nga lider sa China adtong buhi pa kini.
* * *
Unsa may naka-kriminal niana? Dinhi sa ato naay mga t-shirt nga giimprintahan sa nawong ni Ate Glo nga pagkagrabeng ngil-ara. Nagbudlot ang mga mata. Nagtangsa ang mga ngipon. Apan wa may gisikop sa mga nanul-ob ini.
* * *
Mao nang kalainan sa Demokrasya ug Komunismo. Sa Komunismo di ta makapatuyang og sul-ob og t-shirt kay basin og ang napatik sa atong gisul-ob wala higusto-i sa polis, matanggong ta sa karsel.
* * *
Laing nasud diin kuyaw ang magpataka’g sul-ob og printed t-shirt mao ang Myanmar. Gikataho di pa lang dugay nga lima ka mga batan-ong Australian student travelers ang gidakop ug gi-detain tungod kay napatik sa ilang t-shirt ang drawing sa globe diin nibatog ang dove kon pati nga maoy simbolo sa kalinaw.
* * *
Suma pa sa maong taho gi-orderan ang mga estudyante sa paghubo sa maong t-shirt ug gipailis sila sa laing sapot nga ilang gida sa ilang backpack. Gisunog sa mga sundawo ang Peace T-shirts sa mga estudyante.
* * *
Ang gihimo sa mga sundawo nagpaila lang nga no-no ang ilang nasud sa kalinaw. Ug lain kining pruweba nga ang Myanmar lahi gayud og sabaw kay sa ubang nasud nga nahisakop sa Asean.
* * *
TRIVIA — Greetings ngadto sa atong mga magbabasa diha sa Negros Oriental ug Siquijor ... Maayong buntag diha sa mga pasahero sa South Bus Terminal nga naghuwat sa ilang kasakyan padung South. Take care.