Serbisyo sa komunidad

Sa dili pa ang tanan, akong gipanawagan ang mga sakop sa Alpha Theta Omega (Althonians) dinhi sa Sugbo o sa silingang mga lugar nga adto sa beach resort sa pamilyang Radaza sa Lapu-Lapu City ang selebrasyon sa ika-41 ka founding anniversary sa atong fraternity.

Imbis nga sa Nobiyembre 27 (Biyernes), ang petsa sa atong anibersaryo, ang kasaulogan pagahimuon nianang pag-ugma (Sabado) hangtod na sa Domingo. Gituyo kini gumikan kay tingtrabaho ang Biyernes ug daghan kanato ang dili gayud makatambong kun sa maong adlaw himuon ang maong panagtigum.

Sama sa naandam, puwede nato madala ang atong mga pamilya. Gituyo kini aron mas alegre ang kalihokan.

Atol unya sa maong selebrasyon, daghang isyu ang atong panaghisgutan nga may kalabotan sa grupo. Usa sa mga hisgutan mao ang butang pagpalambo sa grupo aron mas mapalig-on pa ang serbisyo niini ngadto sa komunidad.

Alang sa dugang pang kasayuran, kadtong mga miyembro nga wala pa masayod sa kalihokan sa atong anibersaryo mahimong mokontak kang Brod Irlito Piamonte, ang bag-ong presidente sa Cebu chapter.

Alang sa inyong mga kontribusyon, puwede usab ninyong kontakon ang atong tresurero nga si Brod Gilbert Ang.      

Dako gayud ang atong tulomanon pagtabang sa komunidad. Usa kini ka paagi aron mausab ang panglantaw sa publiko sa mga fraternity. Dili malalis nga kun maghisgot kita’g fraternity karon, daghan ang mo-hunahuna nga wala kini kaayohan.    

Kini gumikan usab sa mga dili maayong panghitabo, ilabina dinhi sa Sugbo, nga gikalambigitan sa ubang fraternity ug gang. Bitaw, laganap na kaayo dinhi ang panagbangi sa duha ka fraternity ug uban pang gang violence.

Angay lamang nga mabalik ang respito sa publiko sa mga fraternity. Kini tungod kay ang tuyo sa usa ka fraternity mao man ang camaraderie ug pagserbisyo sa komunidad.

       Hinuon dili usab malalis nga adunay mga fraternity ang magkaribal. Kini tungod usab sa ilang pagpalabwanay kun si kinsay sikat. Dili kini maayo tungod kay mawala na hinuon ang nag-unang tumong sa usa ka fraternity nga mao ang pagserbisyo sa komunidad. 

Ang gikinahanglan lamang mao ang disiplina sa matag sakop sa grupo aron paglikay sa kagubot.

* * *

Sama sa akong gitagna, midaug gayud ang atong pambato nga si Manny Pacquiao batok sa mas dako ug kusgan nga si Miguel Cotto sa ilang kumbati sa Las Vegas kaniadtong Nobiyembre 15. Klarong walay dag-anan si Cotto tungod kay kulatado siya gikan pa sa ikatulong hugna sa ilang away.

Sa wala pa ang away, daghang mitag-an nga mapildi gayud si Pacquiao batok ni Cotto. Kini sa rason nga mas natural nga pagka-welterweight si Cotto, ang kampiyon.

Apan nabali hinuon ang hangin. Si Cotto hinuon ang kulatado. Gani, kaduha siyang na-knock down - sa ikatulo ug ikaupat ka round.

Sukad niadto, wala g’yuy pangontra ang kampiyon gikan sa Puerto Rico sa mga nagpungasi nga mga suntok ni Pacquiao. Hangtud nga gihunong na lamang sa referee ang away sa katapusang round tungod kay iyang nakita nga grabe ang nadawat nga suntok ni Cotto.

Sa iyang kadaugan, dili na gayud malalis nga ang atong pambato mao nay usa sa mga bantogan sa kasaysayan sa boksing.

Gani, siya lamang ang boksidor sa kalibotan nga nahimong kampiyon sa pito ka dibisyon. Usa kana ka kalamposan nga lisod tupngan ni bisan kinsa sa boksing karong panahona.

Sunod ikasangka ni Pacquiao ang wala pay pilding si Floyd Mayweather sa Amerika. Kun madayon ang ilang away, ang mga eksperto miingon nga kini ang labing dakong sangka sa kasaysayan sa boksing.

Sa higayon nga iyang mapildi si Mayweather, ako kumbinsedo nga si Pacquiao na gayud ang labing maayong boksidor sa kasaysayan.

* * *

Email: [email protected]