Iwas sakit: Uminom ng 8-10 basong tubig

ALAM mo ba na ang katawan natin ay puno ng tubig? Ang utak natin ay may 74% tubig. Ang masel natin ay 75% tubig. Kahit ang matigas nating buto ay may 22% na tubig.

Kaya nga hindi ko maintindihan kung bakit napaka­raming Pinoy ang ayaw uminom ng tubig? Mayroon   diyan, 3 baso lang kung uminom sa isang araw. Kulang po ito. Heto ang mga sakit na matutulungan ng pag-inom ng tubig:

1. Para sa sakit sa bato – Ang sanhi ng bato sa bato (kidney stones) ay ang kakulangan sa tubig. Dahil dito, nagiging madilaw ang ihi at namumuo tuloy ang bato. Mag-ingat at baka tumuloy sa kidney failure at dialysis.

2. Para sa impeksyon sa ihi – Kapag kulang ka sa tubig, mas kakapitan ka ng impeksyon sa ihi o balisawsaw.

3. Para sa lagnat – Nakapagpapababa ng lagnat ang pag-inom ng tubig. Ito’y dahil maiihi mo ang “init” sa iyong katawan. Painumin ng tubig at juice ang mga may lagnat.

4. Para sa ubo, sipon at trangkaso – Ang sapat na tubig ay nagpapalabnaw ng sipon at plema. Mas bibilis din ang paggaling sa trangkaso.

5. Para sa pangangasim ng tiyan – Malaki ang tulong ng tubig para mahugasan ang acido sa ating sikmura. Sa pag-inom ng tubig, mababawasan ang ulcer, impatso at sakit ng tiyan. Mas gusto ng tiyan ang maligamgam na tubig.

6. Para lumakas – Kapag kulang ka sa tubig, magiging matamlay ka at manghihina. Lalo na kapag mainit ang pa­na­hon, uminom ng maraming tubig.

7. Para sa sakit ng ulo – Nakatutulong ang tubig sa pagtanggal ng migraine o sakit ng ulo.

8. Para pumayat – Bago kumain, uminom ka muna ng 1-2 basong tubig. Mabu­busog ka nito at hindi ka ma­pa­pakain ng marami. Hindi po nakatataba ang tubig.

9. Para gumanda – Ito ang mahalaga sa lahat. Ang beau­ty secret ng mga dermatologists ay tubig lang. Kapag kulang ka sa tubig, lulubog ang iyong mata at kukulubot ang balat (wrinkles). Uminom ng tubig para kuminis at ku­mintab ang iyong kutis. Umi­was ka rin sa araw para hin­di kumulubot.

Anong klase ng tubig ang dapat inumin? Alam kong may kamahalan, pero umi­nom na lang ng bottled water, purified water o pinaku­luang tubig. Hindi ligtas ang tubig sa gripo. Mag-ingat at baka magkasakit tayo.

Tan­daan:

Para makaiwas sa sakit, uminom ng tubig.