EDITORYAL - Pahalipay ngadtong Manny Pacquiao

Lain nasang kadaugan ni Manny Pacquiao. Lain nasang kadungganan sa nasud nga Pilipinhon.

Nakab-ut gayod ni Manny ang ikapito nga boxing title sa pito ka nagkalain-laing weight division.

Usa kini ka dakong kalampusan nga nakab-ot sa usa ka boksingero sa kasaysayan sa pamoksing ug angay’ng ikalipay ug ihugyaw kini natong mga Pilipinhon.

Manghinaut kita nga magpabilin kini nga usa ka dakong garbo sa nasud bisan pa kun mobiya na si Manny sa pamoksing ug mosulod og laing matang sa panginabuhi ugma damlag.

Sa pagkakaron, miduyog kami sa tibuok nasud sa pagtunol ngadtong Manny Pacquiao sa among mainitong pahalipay.