Kaniadtong bata pa ako nakaabot pa ako sa mga salida sa sine nga inighuman sa The End mogawas ang mga intermissions ug advertisements una pa ipasundayag ang double. Kapoy tuod apan makalingaw kay gawas nga barato ra, nindot pa ang mga salida.
Ingon ini pud ang nahitabo kun maghisgot na kita sa katapusan sa kalibutan. Sige lang nga ipahibalo nga kuno matapos na ang kalibutan apan tan-awa hangtod karon wala pa man lagi. Daghan nato ang nahilansang na hinuon sa kahadlok tungod ning literal ra kaayo nga pagsabot sa kataposan. Alang nako mas maayo nga atong isipon ang matag adlaw ingon nga kataposan aron makahatag kita sa tanang maayo nga gikan nato. Imbis kahadlok ang atong bansayon ato hinuong puy-an ang paglaum.