Isyu sa kampanya

Wala pa gani moabot ang adlaw alang sa opisyal nga pagduso sa kandidatura sa COMELEC, daghan na kaayong mga personalidad nga migawas sa TV, pamantalaan ug radyo aron pagdiskutir sa ilang mga plataproma kunohay. Bisa’g wala pa ang gisitar nga panahon alang sa kampanya, ubay-ubay na ang nagpaila-ila sa ilang kaugalingon ngadto sa publiko ug mipadayag sa ilang baroganan sa pipila ka isyu nga naghamok sa nasud.

Usa sa nag-unang isyu nga gigamit sa mga politiko sa ilang kampanya mao kining kawad-on ug kagutom. Importante alang sa umaabot sa Pilipinas nga insakto ang mga lakang nga buhaton sa umaabot nga mga mamuno sa nasud aron pag-sulbar o pagpakunhod sa kawad-on sa nasud.

Sumala pa sa Millennium Development Goals sa United Nations, ang tanang mga nasud sa kalibutan adunay hangtod sa tuig 2015 aron pagpakunhod sa kawad-on ngadto sa tinunga. Makab-ot kaha kini sa mosunod nga mamunoan? Depende gyud kini kun unsa nga mga lakang nga ilang buhaton, ug mga desisyon nga ilang himoon. Ug karon pa lang, ato nang maaninaw kun unsay paagi niining pipila ta ka kandidato simbako kun sila mapili.

Adunay kandidato kansang mensahe miingon nga gikan siya sa kakabos, apan tungod sa kakugi ug pagpailob, iyang nakab-ot ang kahamugaway. Nga sa ato pa, ang iyang mensahe mao nga kinahanglan kitang magkugi ug magpailob aron makab-ot ang kauswagan. Nindot paminawon, apan dili kitang tanan adunay sama nga kahigayonan nga iyang naangkon. Busa, unsa may buhaton sa iyang panggoberno aron ang atong mga kaigsoonan nga maningkamot ug magpailob makakab-ot usab sa kahigayonan nga moasenso?

Adunay usa ka kandidato nga miingon nga edukasyon ang yawe sa kauswagan. Nindot usab paminawon. Apan unsa may buhaton sa iyang pang-goberno aron makab-ot ang edukasyon sa atong mga batan-on? Ug unsa man kahang klaseha sa edukasyon kini? Mulahotay kaha ang kalidad niini kun itandi na sa edukasyong nakab-ot didto sa ubang nasud?

Diha say kandidato nga miingon sa usa niya ka pakigpulong nga kun gidili ang kapobrehon, mas labaw pa kunong gidili ang kahamugaway? Ubay-ubay nga kilay ang miisa sa maong mensahe, tungod kay duha lang ang buot ipasabot niini: dili siya buot nga mouswag kita, o giulog-ulogan na sab niya ang mga kabos ug gitaptapan ang mata sa kamatuoran.

Kining maong pagtratar sa isyu sa kawad-on gihimo usab kaniadto sa lain pang mga kandidato. Igo lamang silang miapila sa emosyon sa mga kabos natong kaigsoonan, apan wala silay kongkreto nga mga lakang nga gipadayag.

Aduna say mga kandidato nga miingon nga sa ilawom sa ilang liderato, ubanan kita nila aron pag-atubang sa mga hagit sa kinabuhi, ug nga dili kuno kita nila pasagdan. Ang pangutana, anaa na man mo daan diha sa pwesto, tinuod ba gud nga wala mo mobiya kanamo? Di kaha nga mahinumdom lang mo namo kun ting eleksyon na? Hinuon, aduna say uban nga makita nato ang ilang mga nabuhat nga maayo alang kanato, bisan kun usahay makasugat silag mga pagsaway gikan sa pipila nga adunay mga personal nga interes.

Atong makita nga kasagaran sa atong mga kandidatong nangambisyon nga mag presidente, walay mga kongkretong polisiya, plataporma o lakang aron pagkunhod sa kawad-on sumala sa gisitar sa United Nations. Kasagaran kanila, igo lamang miulog-ulog kanatong mga pobre aron mahulog ang atong simpatiya kanila, aron ingnon nga mibati sila kanato. Apan nakadaot niini nga style, kay kinaraan na kini ug, sama sa nanglabay’ng pila ka dekada, kadaghanan sa ilang mga istorya nga buhian inig eleksyon, mga binutbot lang.

Ang kawad-on sa Pilipinas dili lamang problema nga ekonomikanhon ang solusyon. Ang paghatag og panginabuhi dili igong tambal sa maong kanser sa sosyedad. Mosulbad man kini sa temporaryo natong kahimtang, apan dili kini kaseguroan nga dili kita mobalik sa naandan. Nagkinahanglan usab kita’g pag-usab sa mga naandang hiwing buhat o pagtuo, pagpabalik sa dignidad aron mabalik usab ang kadasig sa pagpaningkamot aron dili kita magpabilin sa lunangan sa kawad-on, pagpabalik sa mga tradisyong Pilipinhon nga maoy gidayeg sa ubang kanasoran sa mga Pilipino, sama sa pagkamasaligan, matinud-anon, konserbatibo, responsableng ginikanan, mahigugmaon sa nasud ug sa Labaw’ng Makagagahum, maikogon ug maabi-abihon, mga hiyas nga hapit na mawala kanatong mga kabos nga Pilipino.

* * *

Alang sa inyong mga panahom, palihug email sa [email protected].

 Daghang salamat.