Pastilan baya uy!

Kining mga opisyal ug kawani sa Department of Trade and Industry (DTI) angay gayod nga maoy mangunay paghimo og kampanya aron malikayan ang posibleng sunog sa Pasko.

Angay’ng kampanyahan g’yod unta sa DTI pinaagi sa pagsakmit diha sa mga baligyaanan kadtong mga “substandard” nga produkto, ilabi na ang mga Christmas lights.

Kun dili sila magtagad, hayan nga makamugna kini og sunog ug makapademalas sa katawhan atul sa Pasko. Dili ba kamo makonsyensya nga wala makatuman sa inyong kaakohan?

Sayon ra kaayo unsaon pag-ila sa mga substandard nga produkto. Gusto ba kamo nga magpatudlo sa pinobre nga pamaagi?

Mahimo man nga mopalit kamo og produkto sama sa Christmas lights, unya himoon ninyo kini nga “sample” ug tan-awon kun ang iyang gigamit nga alambre nakapasar ba sa lagda.

Daghan pa kaayong mga produkto nga gibaligya sa barato ra kaayo nga kantidad apan peligro, sama sa soldering iron ug uban pa.

Ang katawhan dili mabasol kun mopalit sila sa maong mga barato nga produkto kay nangyawat man sila nga makadaginot ug nagtoo man sila nga ang tanang produkto nga gibaligya, luwas kini nga gamiton.

Arang-arang pa ang mga kawani sa Comelec nga gihulagway nga usahay walay klaro nga trabaho human sa eleksyon, kay busy man usab sila sa eleksyon.

Apan ang DTI pastilan, daw sa natulog lang sa ilang katungdanan. Buyno, kun duna mo’y reaksyon pasabta ninyo ang katawhan sa inyong pagkuwang.

* * *

Dakung demolisyon sa kabalayan sa mga squatters nga namuyo kilid sa Mahiga Creek diha sa barangay Mabolo ang ipahigayon sa mga sakop sa Squatters Prevention Encroachment Elimination Division (SPEED) karong Nobyembre 12 ug 13.

Lauman nato nga magbaton na unta og kaisog ang mga opisyal sa City Hall, dili kay mag-ukon-ukon ug ipasuwahi ang pagpamolitika.

Kini god nga mga tawo nga anaa magpuyo daplin o anaa g’yod sa sapa ang mga haligi sa balay, kun maanod kini sila, problema na usab sa kagamhanan sa dakbayan.

Tan-awon nato kun may kaisog na ba sila. Kuyawan ko kun mosalga na usab kining consultant sa City Hall nga kusog kaayo nga magdupa-dupa kun may demolisyon.

* * *

Nalutsan ang mga politiko kay aprobado na man diay kuno ang balaud nga mopahamtang og 5 % nga buhis sa campaign expenses atul sa eleksyon.

Mora’g nakatulog tingali ang mga magbabalaud nga mituki kaniadto sa dihang ang Internal Revenue Code of 1997 ila pa nga gigama. Apan unsa may resulta kun ipatuman g’yod kining maong balaud sa Bureau of Internal Revenue?

Ang tinuod, namakak na man gani daan karon ang mga politiko sa tinuoray nilang gasto, unsa pa kaha kun buhisan na ang ilang expenses? Pagka karon god ang balaud naglatid man nga hangtud lang sa P3 ang gastohon sa usa ka kandidato sa matag botante diha sa ilang dapit kun sila sakop og political group.

Kun independent sila, tag P5 sa matag botante. Apan sayod na baya mo nga daghan sa atong mga politiko karon migasto na gani og minilyon ka pesos sa ila lang propaganda nga wala pa gani magsugod ang eleksyon.

Mosugot kaha sila nga buhisan ang ilang campaign expenses? Kun mapugos sila kay balaud man, ilang pakubsan pag-ayo ang kantidad.