Sipa ug makabungog ang pagdayeg nga naangkon sa National Bureau of Investigation tungod sa paglutos sa grupo sa notadong tulisan nga si Alvin Flores.
Gipuhalan sa NBI ang kapolisan didto sa kaulohan nga wa masayod kun diin motago ang grupo ni Flores human sa ilang pagpanulis sa usa ka tindahan og mahalon nga mga relo didto sa Makati City niadtong Oktubre 18.
Samtang wala pa mahuman sa ilang pagbutikaw-butikaw ang kapolisan asa nila pangitaa ang grupo ni Flores ang mga tulisan dinhi na sa Sugbo nangita og laing mamahimong biktima.
Tinuod, trabaho maoy gianhi nila ni Flores sa Sugbo ug dili bakasyon. Ang akong tinubdan nag-ingon dunay walo ka mga target ang grupo ni Flores dinhi sa Sugbo ug hayan magmata unta og buntag ang kapolisan kun wala pa masundi sa mga ahente sa NBI ang maong grupo.
Salamat sa kalantip ug kangilngig sa intelligence sa NBI ilang nasakpan ug napatay sa engkwentro ang lider sa mga tulisan ug tulo niya ka mga sakop apil na ang iyang sinaligan nga si Ritchie Hijapon.
Kun wala pa masakpi sa NBI ang maong tulisan usa unta sa walo nila ka mga target ang posible nga ila nang natulis.
* * *
Apan luyo sa kalampusan sa NBI dunay mga tawo nga posibleng bunga sa kasuya buot mo-descredit niini pinaagi sa pagpagawas og mga estorya nga way engkwentro nga nahitabo kun dili gituyo sa mga ahente sa NBI pagpatay ang maong mga tulisan.
Usa ka wa magpaila nga intelligence officer sa kapolisan ang gikutlo sa report sa usa ka lokal nga mantalaan nga duna kunoy saksi nga wala sab ilha nga mitug-an nga dinakpan nang daan ang grupo ni Flores dihang gidala ni didto sa Compostela.
Matud pa nga gipagawas lang sa NBI nga engkwentro bisan og dili ni maoy nahitabo.
Pastilan kun kinsa may utok sa maong intriga pangita pod og katuohan nga scenario kana bang dili binugo.
Tiaw mo bay matud pa gi-salvage silang Flores. Matud pa nga gidala kuno ni og tuyo dinhi sa Sugbo aron patyon.
Kabogo sab sa mga sakop sa NBI nga gisuroy-suroy usa ang dinakpan usa gipatay. Dili pa igo gibinlan pa gyud og saksi kay duna may usa nga wa patya.
Kataw-anan pud sa maong intriga nga klarong di lang binugo kun dili timailhan pa gyud sa kasuya.
* * *