SRP maayo g'yod

Dili g’yod tinuod nga nabentahaan ang dakbayan sa Sugbo pagsulod niini og “loan” gikan sa Japan nga gigamit pagmugna og South Reclamation Project nga karon gibunyagan na og South Road Properties.

Ang orihinal nga “loan” nagkantidad lang og kapin sa P3 bilyones, apan tungod sa pag-ubos sa presyo sa peso kun itandi sa Japanese Yen, ang utang misaka ngadto sa P6 bilyones.

Apan ang SRP dunay 295 hektareyas. Samtang ang gipaabot nga mahalin, 10 ka hektareya pa lang sa kantidad nga P1.5 bilyones, unya laing 30 hektareya nga paliton na usab og P2.6 bilyones.

Sa ato pa, sa 40 ka hektareya nga yuta nga mahalin, ang kantidad miabot na og P4.1 bilyones ang nakwarta sa dakbayan. Wala pay labot unya sa madawat nga bahin sa syudad gikan sa Joint Venture Agreement tali sa Filinvest Land Inc.

Kun ang 295 hektareyas nga SRP ibanan og 40 hektareyas nga mahalin, nagpasabot nga duna pay nahabilin nga 255 hektareyas. Sa ato pa, ang P6 bilyones nga utang sa dakbayan gikan sa Japan, gamay ra kaayo kini sa mahalin sa syudad.

Unya, maisip ba nato nga “disadvantage” ang maong SRP project? Husto si Mayor Osmeña sa iyang pangangkon nga ang SRP maoy makapahimo sa dakbayan sa Sugbo nga labing datu nga syudad sa nasud.

* * *

Dili angay’ng kaloy-on ang kining mga tawo nga nag-antos karon sa taas kaayong linya aron moparehestro sa Comelec aron nga sila makabotar sa eleksyon sa sunod tuig.

Pwerteng dugaya na sa continuing registration nga gisugdan sa Comelec apan karon pa sila nag-ambahan diha sa Comelec nga talitapos na hinoon ang pagpang-rehestro ug niadtong buot mobalhin pagbotar.

Hala, pagbuwad mo diha sa kainit sa adlaw kay kaniadto nga layo pa, wala man kamo maminaw.

* * *

Daghang nangutana nako kagahapon kabahin sa extended firearm amnesty program sa kagamhanan. Maglisud ko pagtubag kaninyo kay mahutdan ko sa “load” kun tubagon nako kamong tanan.

Ang awhag nako kaninyo mao nga direkta na lang kamo nga mangutana sa Firearms and Explosives Unit diha sa Camp Sergio Osmeña Sr. kun gusto g’yod kamo nga mopalisensya sa inyong armas.

Aw kun gusto mo, tawag na lang mo nako, ayaw lang sa text message kay malangan ta og tinubag nga dili ra ba mahimong mub-on pagpasabot. Kutob na lang karong Oktobre 31 ang deadline sa amnesty.

Ako bitaw, nakuha na nako sa balay sa akong Lolo ang iyang kabilin nga karaan niyang Thompson sub-machine gun. Wala may gana ang akong mga uyoan nga mohupot og armas, aw agwantahon na lang nako nga ako’y mag-antos pagkalib-ay niini, bahala og bug-at.

Ang Thompson sub-machinegun, ang bala niini 45 kalibre. Kun imong huna-hunaon, mas mauwaw ka nga mobangon kun maigo niining maong armas kay sa M16 Armalite rifle.

* * *

Hangtud karon, wala pa gihapo’y lakang ang mga opisyal sa dakbayan nga mopalit sila og excavator nga maoy gamiton sa pagpalawom sa atong kasapaan. Kun wala sila’y tinguha nga mopalit niining maong kahimanan, mahimo unta sila nga mo-hire og private contractor.

Apan ang labing nindot g’yod nga sila ang motrabaho ug mopalit og excavator. Sa ingon, masumpo sa hinay-hinay ang paglunop dinhi sa dakbayan ta.