Duna bay gitagoan si Peras?
Daghang salamat ni executive judge Mienrado Paredes tungod sa iyang ka sensitibo sa reklamo sa mga sakop sa media hinungdan nga dali niyang gipasiugdahan ang usa ka dialogue tali nilang mga huwis ug mga reporters tungod sa wa pagtugot sa mga sakop sa media nga makatambong sa husay sa kaso batok ni Ruben Ecleo Jr. sa miaging semana.
Atol sa dialogue, bisan wa masulbad kinsay nagmando sa mga security personnel sa korte nga dili pasudlon ang media, apan ang huwis nga naghupot sa kaso nga si Judge Soliver Peras mipasalig nga makatambong na ang mga reporters sa sunod nga husay karong petsa 28.
Hinuon iyang gi-awhag ang media nga mosubmitir og listahan didto sa iyang sala “for security purposes.”
Bisan og nakaila siya sa mga reporters ug bisan una ning higayon nga iyang gihimo sa way kusmod ang mga membro sa Media Alliance for Law Liberty Equality and Truth mituman niini. Apan nasurprisa ang mga reporters tungod kay gusto naman pud ni Peras nga mosubmitir gyud ang mga reporters og 2x2 picture.
Sa gihapon, seguridad ang iyang gihimong rason paghimo niini. Ang iyang mga kaubang huwis mihulagway sa iyang gihimo nga “unreasonable.” Gani sa tanang huwis sa dakbayan sa Sugbo siya ray naghimo niini.
Ang kaso ni Ecleo segurado ko nga wa ni malakip sa listahan sa mga kaso segun sa lagda sa Korte Suprema nga dili mamahimong i-cover sa media. Gani silang mga huwis admitido niini.
Apan nganong labihan ka “over acting” ni Peras? Kanus-a man sab nahimong hulga sa siguridad nilang mga huwis ang presensiya sa media?
Buweno ang presensiya sa media mamahimong hulga sa kalihukan sa mga huwis labi pa kun duna silay gustong itago sa publiko. Mamahimong hulga sa usa ka huwis ang media kun duna siyay plano nga tuk-on ang hustisya bugti sa lingin ug kwadrado nga mga rason.
Busa kun way gitaguan si Peras nganong mura man siya og hadlok nga dunay media nga magbantay sa husay sa kaso ni Ecleo? Makatabang ni Peras kun dunay media nga bantay tungod kay sa higayon nga dunay mga pasangil nga siya bias sa paghupot sa kaso ang media ug ang publiko nga nakasunod sa husay pinaagi sa media reports masayod kun tinuod ba o dili ang maong mga pasangil.
Unsa may naka espesyal sa kaso ni Ecleo nganong labihan man ka OA ni Peras nga dili man siya ingon niini sa ubang kaso nga iyang gihuptan? Si Peras sab maoy naghupot sa kaso pagpatay sa abogado nga si Richard Sison apan abli man ang husay niini sa media nga way daghang kuti.
Nganong sa kaso ni Ecleo kalit man niyang giisip ang media nga daw hulga sa iyang seguridad? Kun duna may hulga sa iyang siguridad nga angayan niyang kuti-kutihon mao ang mga tawo nga manambong nga wa siya makaila sama sa mga membro sa PBMA.
Alang nako taphaw nga rason ang seguridad sa iyang paglisudlisod sa media tungod kay sa unang bahin hugot ang seguridad sa Palace of Justice. Ang tanang tawo girekisa nang daan didto sa entrance pagsiguro nga way magdala og hinagiban. Ikaduha sa ganghaan sa iyang korte duna pa gyuy laing mga security nga magbantay.
Wa pa ni labot sa iyang mga bodyguards nga duha o tulo ka buok nga mga sundawo ug polis. Si Peras mismo dunay kaugalingon nga armas nga gitakin.
Gani siya ray bugtong huwis nga akong nakit-an nga lupig pay polis tungod kay kanunay gyud nga naka outside holster ang iyang pusil. Magkalisod magsalibay pa og armalite o ba kaha machine pistol sulod sa Palace of Justice bisan atubangan sa publiko.
* * *
- Latest
- Trending
