Pagluyong og kahoy

Labihang inita sa mga pasalig sa pagpaluyo nga among nadawat alang sa lapad nga pagpananom og kahoy sa Mandaue City Ecological Park sa Casili ug Cubacub karong Domingo. Gatosan na ang nipadayag sa ilang tinguha sa pagsalmot sa kalihokan. Maong natental mi karon sa pagpausbaw sa among tumong nga makatanom og lima ka libo ka punoan sa kahoy.

Nagkinahanglan hinuon mi’g dugang mga boluntaryo pagkubkob sa mga lungag aron hingpit na nga maandam ang luna. Kun duna moy dagkong bara, piko ug pala ug dagkong bukton, palihug tawgi mi sa DYAB landline 4221950 hangtod karong Sabado. Kun kuwangon gyod ang mga lungag, gikinahanglan gihapong mga sangkap sa pagkubkob hangtod sa adlaw na pagpananom.

* * *

Ang lapad nga luna nga atong tamnan karong Domingo mao ang makaluluoy nga biktima sa ilegal nga pagpangubkob sa anapog sa nangaging katuigan. Ang binuang nga napasagdan sa nangaging mga pamunoan nabaraw lang dihang gideklarar nang Mandaue City Mayor Jonas Cortes ang luna nga ecological park.

Gikahadlokan nga ang luna pulos anapog. Maong kinahanglan nga dak-on ang lungag aron matino nga mabuhi ang mga punoan sa kahoy. Kun mahimo pa gani, angay sang abunohan og garden soil ang matag lungag. Nihit ang garden soil sa Mandaue. Kinsay nakabasa ini nga may mapaambit nga tambok nga yuta, ug kinsa say may trak nga ganahang motabang paghakot sa yuta, palihug ayaw pagmakuli pagtawag dayon namo.

* * *

May mga nitanyag na sab nga magda og pagkaon alang sa mga mananom. Apan tungod sa kadaghan sa mangapil, di ming kapasalig nga maapod ang tanan. Mao nga palihug ayaw kalimti pagda ang inyong mga bawon. Mahingpit ang kamahuloganon sa kalihokan kun human sa pagpananom magsawo ta pagkaon uban ang pangandoy alang sa malambuon nga kalikopan.

Magkinahanglan pa hinuon mi og dugang mga sakyanan. Nga makada sa mga mananom ngadto sa ecological park. Mag-abot ta sa ABS-CBN Broadcast Complex sa Jagobiao, Mandaue City sa alas-6 sa buntag karong Domingo aron makasugod na ta’g pananom samtang di pa kaayo init ang adlaw.

* * *

Wa mag-inusara ang Mandaue sa pagpakabana alang sa kalikopan. Ang lungsod sa Liloan magpasiugda sab og laing hugna sa pagpananom og kahoy sa sunod semana. Ang Liloan dugay nang kaabag sa DYAB Abante Bisaya ug ABS-CBN Cebu di lang sa pagpananom og kahoy sa kabukiran ug bakhaw sa kabaybayonan kun dili apil na sab sa job fair, Boto Mo i-Patrol Mo, Halad sa Kapamilya ug uban pang kalihokan.

Kun duna sab moy susamang kalihokan, ayaw panagana pakiglambigit namo. Libre ang among airtime pagsabwag sa mapuslanon ninyong kasayuran aron makahibawo ang labing daghan. Hapit na hinuon mapuno ang among kalendaryo sa umaabot nga kalihokan sa Bohol, Negros Oriental ug Leyte.

* * *

Email:[email protected]