EDITORYAL - Ipatuman ang curfew

Anaa pa ba ang curfew alang sa mga bata? Kun anaa pa, gipatuman ba kini sa otoridad?

“Paminaw ko nalimtan na kining curfew,” suma pa sa usa ka taxi driver ngadto sa iyang pasahero nga usa ka mediaman.

Nalimtan kuno kay sa iyang paglibot-libot sa dakbayan sa mga oras nga unta ipatuman ang curfew, naay daghang mga bata nga naglaroy-laroy sa kadalanan.

Kun “active” pa kining curfew, angay lang nga ipatuman dili lang tungod kay balaud kini kundili usab kay gikinahanglan ang implementasyon niining panahona.

Mga menor de edad nga nalambigit sa nagkadaiyang krimen atol sa kagabhion padayon tang mabasa sa mantalaan ug madungog sa radyo ug telebisyon. Ni Juanito V. Jabat