Kailan babalik?

Kailan babalik Sintang Pilipinas

ang dating panahong masayang lumipas?

Mga tao noo’y sagana sa lahat

walang nagnanakaw – walang nandarahas!

Kailan babalik dating disiplina

na sa ngayon dito’y waring naglaho na?

Ang simpleng gawain tungkol sa basura

tinalikdang lahat kaya nagbabaha!

Kailan babalik masasayang araw

na ang mga bata ay nagtatampisaw –

Nagsisipaligo sa patak ng ulan

pagka’t nililinis kanilang katawan!

Ang delikadesa’y kailan babalik

sa mga nilikhang sa p’westo ay sabik?

Kahi’t masasama’t ang ngala’y may batik

kandidato pa rin sa p’westong mainit!

Kailan babalik taong may prinsipyo

na noon ay gawi ng taong may modo?

Di sila gahaman sa pagnenegosyo

Nasisiyahan sila sa kokonting tubo!

Kailan babalik yaong katapatan

na dati ay taglay sa puso’t isipan

Ng mga nilikha na namamasukan

kaya ang gobyerno ay maaasahan?

Panahong masungit hindi nagbabanta.

pagka’t ang basura’y malayo sa baha;

Pagdaan ng bagyo’y ikinatutuwa

dahil nadidilig bukiring sagana!

Magbalik pa kaya ang magandang asal

nitong kabataa’t mga mag-aaral?

Sila’y nagmamano pagdating ng bahay

at sa matatanda sila’y nagpupugay!

Babalik pa kaya ang lahat ng ito

sa ating panahong tila nagbabago?

Pagbabagong ito kung lilimiin mo –

ang may kasalanan ay tayo ring tao!