Abuso sa deputation

Hangtod asa ang gahum ni Byron Garcia isip consultant on security matters nga makabuotbuot siya pagpaningil og P5 matag pasahero ug tag P100 kada minibus nga mosulod sa Cebu South Bus Terminal?

Sa akong gamay’ng nahibaw-an, ang consultant sa usa ka lokal nga kagamhanan limitado og gahum, kun ugaling aduna kini gahum subay sa lagda.

Apan sa atong obserbasyon ug gamit ang sentido komon, hilabihan na kadako sa gahum nga gigamit ni Byron diha sa Kapitolyo nga hasta na ang mga butang nga maghisgot sa kuwarta, apil na siya.

Sama pananglit sa Cebu Provincial Detention and Rehabilitation Center (CPDRC), gihimo kakuwartahan ang pagpasayaw sa mga binilanggo. Si Byron consultant lamang sa Kapitolyo “on security matters” apan bisan sa prisohan sa probinsiya siyay hari, labaw pa sa warden.

Ang terminal napanindot karon na lang nga si Gobernador Gwendolyn Garcia na ang nagdumala sa lalawigan. Bisan sa panahon sa iyang amahan nga si Kongresista Pabling, wala makapanindot niini.

Apan kun hisgutan na ang pagpaningil og terminal fee, nagkinahanglan kini og pagtugot sa Provincial Board tungod kay usa kini ka panguwarta nga nagkinahanglan og awtorisasyon ug aron mabutangan og lokal nga balaod pagseguro asa mapunta ang kitaon niini.

Si board member Victor Maambong nakalitan sa pagpaningil og singko-singko sa south bus terminal. Wala usab siya makahinumdom nga aduna sila sa Provincial Board gipasar nga ordinansa alang sa maong katuyoan.

Asa man diay kuha og gahum si Byron aron makamando pagpaningil og P5 kada pasahero ug P100 kada mini-bus?

Mismo si Gwen nga maoy gobernador sa lalawigan dili makabuotbuot og panguwarta kun walay pagtugot sa Provincial Board.

Milabaw na hinuon ang iyang igsuong si Byron nga consultant ra niya?

* * *

Gidepensahan ni Land Transportation Office (LTO-7) regional director Raul Aguilos ang tulo ka mga sakop sa Civil Security Unit (CSU) sa Kapitolyo nga nanakop og mga mini-bus sa eskina V. Rama ug Natalio Bacalso Avenue.

Nasayod ko nga ang “deputation” nga giisyu ni LTO Asst. Sec. Arturo Lomibao sa tanang deputized sa LTO mahimong ma-enforce sa tibuok nasud tungod sa akong pagtuo nga national ang scope niini.

Apan kun sentido komon gihapon atong sundon, kuwestiyonable kaayo ang pag-operate sa mga empleyado sa Kapitolyo sa kadalanan sa siyudad sa Sugbo nga gidumala sa mga empleyado sa City Traffic Operations and Management (Citom) nga kontrolado sa Cebu City Hall.

Wala ba diay silay salig sa Citom nga bisan sa adlaw’ng Sabado ug Domingo nagpakatap og traffic enforcers?

Mga CSU man kaha sila, busa ang ilang trabaho mao ang pagguwardiya sa terminal.

Sabado nila gihimo ang operasyon. Ang trabaho sa mga sakop sa CSU mao ang pagguwardiya sa Kapitolyo ug sa mga buhatan nga ubos sa pagdumala sa kagamhanan sa lalawigan, sama sa terminal.

Off-duty ba kaha sila atol sa ilang pag-operate sa siyudad sa Sugbo?

Nganong ang gipanakop sa tulo ka sakop sa CSU mao ra man kadtong mga mini-bus nga nagdumili pagsulod sa terminal kay dili gustong mobayad og P100 ini’g sulod?

Dili ko mokuwestiyon sa “wisdom” ni Lomibao pagpirma sa deputation sa tulo ka CSU.

Apan maayong irekomendar ni Aguilos ngadtong Lomibao ang pagkanselar sa deputation sa tulo ka sakop sa CSU nga migamit sa deputation order sa pagpangabuso.

Dakong abuso sa deputation order ang pag-single out sa mga mini-bus nga wala mosunod sa kagustohan ni Byron.

Usa pa gyud, nasayod si Aguilos nga wala kinahanglana sa siyudad sa Sugbo kanang tulo ka sakop sa CSU tungod sa kadaghan sa mga traffic enforcers.

* * *

Bag-o na og hepe ang Wharfinger’s Office sa Bureau of Customs - Port of Cebu.

Si Peter Paul Fenix gihulip sa akong higala ug kumpare nga si Jun Nagac.

Sa taas-taas nga pagdumala ni Nagac sa maong buhatan, nakapatuman siya og mga kausaban, ilabi na ang seguridad sa mga gipangsakmit nga mga kargamento sa adwana nga kasagaran maoy paborito sa mga kawatan (pilferers).

Nasayod ko sa kakugihan niining Fenix sukad sa iyang pag-clerk hangtod nga nahimo siyang assistant customs operations officer.

Kay siya man ang gitudlo ni Customs District Collector Ricardo Belmonte isip tagdumala sa ganghaan sa adwana, busa gibubo ngadto kaniya ang tanang pagsalig.

Ang ako lang, maayong ipakita ni Fenix ngadto kang Belmonte nga kaya niya nga modumala sa maong buhatan tungod kay ang Wharfinger maoy katapusang buhatan nga dangpan sa mga importer sa dili pa ma-release sa adwana ang mga kargamento.

Usa sa trabaho nga angayan bantayan ni Fenix mao ang palusot sa mga kontrabando nga i-smuggled agi sa adwana.

Hagit ni Fenix ang bag-o niyang trabaho nga kun wala ko masayod, unang posisyon nga siya’y hepe.