Hoy Capt. sulbara ni!

CEBU, Philippines - Ang akong kauban sa opisina mitug-an nako nga mihasi man diay ang mga kawatan diha sa barangay San Antonio, ilabi na diha sa dalan R.R. Landon dili layo sa eskena D. Jakosalem.

Daghan na kaayo ang nabiktima sa maong mga kawatan nga wala pa g’yod masakpi. Dunay mga sakyanan ug panimalay nga gilungkab ug nakuhaan og mahalong mga butang.

Apan diha pa gani’y lumulopyo sa maong dapit nga miuli nga lawom nang gabii, gitulis. Pastilan, unsay gihimo sa mga opisyal sa barangay. Hain na man ang mga agents to persons in authority sa maong barangay?

Kapitan Allan Masecampo unsa may imong gihimo niini. Hagit kini sa imong pagka kapitan nga tabangan nimo ang kapolisan nga masulbad ni. Pangita og paagi nga mailhan ug madakpan kining mga kawatan.

Aksyoni tawon ninyo ni kay ang uban gani sa mga lumulopyo sa maong dapit anha na lang tawon matulog sa sala kay aron makabantay kun may tawo nga manglungkab ug makasulod sa ilang balay. Kun ako pa hinuon ang natumngan, mahagit g’yod ko pagdakop aning mga tawhana. Kun dili madakpan aw balhinon nato ang birthday sa maong mga kawatan ngadto sa Nobyembre 1.

* * *

Tambag nako sa mga taga San Antonio nga kun wala g’yoy mahimo ang mga barangay opisyal sa inyong dapit, palisensya na lang kamo og armas.

Nagpadayon karon ang usa ka buwan nga “extended amnesty program” sa kapolisan diin morehestro sila sa mga armas nga walay lisensya, unya walay kuti nga pamaagi ug barato pa g’yod ang bayad.

Pahimusli ninyo kining maong kahigayonan. Tiaw mo nga P1,000 na lay bayad gikan sa P5,000 kaniadto. Ang mga lisensyado apan mi-expire na ang lisensya, P650 na la’y bayranan. Nindot man god kun duna kay armas ba. Pananglit dunay makasulod nga kawatan sa imong balay, aw ang-ang man og labayon nimo’g bato.

Ang tinuod, gusto unta ko nga moangkon og armas aron akong palisensyahan, apan kining kalisud maoy mibabag kay mahal man usab god ang armas. Aw naay barato apan dali ra usab maguba.

Sa balay, nag-andam lang tawon ko og mga bato nga ilabay kun may kontra sama sa kawatan, ug bunal gikan sa bahi sa lubi. S’yaro og dili motagoktok ang ulo kun maigo. He! He!

* * *

Ang usa ka tanod sa barangay San Antonio miingon nga sila ra kuno ang bantayan sa mga kawatan. Kun magpatrolya kuno sila sa maong dapit wala man sila’y makita nga kawatan.

Nagtoo siya nga kun tua na sila’s layo anha na moatake ang mga kawatan. Sus, daghang pamaagi sa imbistigasyon aron mailhan kinsa kining maong mga kawatan. Gamita ang inyong intelligence network. Unsa wala mo?

* * *

Kini bitaw’ng mga tawo nga maigo sa atong lindog, bisan wala nato hinganli, mailhan nimo nga masuko. He! He! He!

Ang tinuod, ang uban sa mga kawani sa City Hall nga pirmi lang nato makita nga anha mag-standby sa lobby sa City Hall nga manigarilyo ug magsultihanay, mga higala ra nako.

Karon, dili na motagad. He! He! He! Masuko diay mo? Mas ang mga magbubuhis pa gani ang masuko kay nag-usik-usik ra mo’s sweldo nga gikan sa ilang buhis.

Ang maayo ninyo nga buhaton, magtarong sa inyong trabaho aron nga makita nga takus ug dili kamo angay’ng mauwaw nga modawat sa inyong sweldo.

Kun ako’y sweldohan nga walay trabaho mauwaw ko uy.