Kakak ang Ombudsman?

Labihan nakong pakpak pagkabati sa taho ni Carine Asutilla sa TV Patrol Central Visayas nga ang Visayas Ombudsman, sa kataposan, nakaangkon na gyod og kaisog sa pagsupina sa mga dokumento sa pagpalit sa Kapitolyo sa luna sa mga Balili sa Tinaan, Naga, habagatang Sugbo. Ambot tungod ba kaha sa agresibong pagsunod sa media sa kontrobersiya, o tingali gipul-an na sa way kinutobang panagana sa ilang kadagkoan, nakapasalamat ko sa Kahitas-an nga nangahas na gyod ang Ombudsman pagmando ni Gobernador Gwen Garcia pagtahan sa mga dokumento sa nabulilyaso nga transaksiyon.

Apan ang akong kalipay niawop dayon. Usa ka semana human giluwatan ang subpoena duces tecum, wa pay papel nga gihatag ang Kapitolyo. Ug ang Ombudsman, sama sa naandan, wa magdali.

* * *

Si Deputy Ombudsman Pelagio Apostol di gyod diay kasaligan. Bag-o ra ganing nipagarpar nga paspasan nila ang mga imbestigasyon sa pagtukod sa Cebu International Convention Center (CICC) ug sa pagpalit sa luna sa mga Balili aron di sila maapsan sa nagkaduol nang piniliay sunod tuig, nikagar dayon. Wa pa gyod diay tingali tugki og kaisog pagtuman sa ilang gimbuhaton, labi na kun dagko ug mga gamhanan ang hingtungdan.

May sukaranan ang kahadlok nga mahisama ang kasong Balili sa mga kasong nahilambigit sa Asean Summit. Morang umang ang mga kaso sa deco lampposts, niungot ang pakisusi sa surveillance cameras ug wa pa gyo’y nasupinahan nga bisan usa na lang ka dokumento sa CICC.

* * *

Hain na man diay ang gipasalig sa Kapitolyo nga kabukas nila sa bisan unsang imbestigasyon sa ilang pagpalit og luna ilawom sa dagat? Kun unsa kaabunda ang ilang mga dokumento alang sa powerpoint presentation, nga gitangkil pa gani ang logbook sa mga lakaw ni Provincial Board Member Juan Bolo, nganong ingon man sab kanihit ang ilang pag-abag sa Ombudsman?

Taphaw ang pagdangop sa department heads sa ilang naandang panagang: Nga nahatag nang mga dokumento ngadto sa Commission on Audit (COA). Kinsa may motuo nga gitahan ang tanan nilang orihinal ug duplicate copies?

* * *

Anugon ang dali rang nalawos nga kaisog sa Ombudsman. Kay way usang nasayod kanus-a sila mangahas pagpangisog pag-usab. Wa ra ba sila igdungog sa kataas og lahutay. Dali ra kaayong makalimot sa karaang mga kaso kun matabonan na sa mas bag-ong mga eskandalo.

Kakuyaw kun moapil na sab ang Ombudsman pagsusi sa pasangil nga gigamit ni Cebu City Mayor Tomas Osmeña ang iyang buhatan ug ang kapolisan aron pagdupa sa iyang anak nga si Miguel nga gitumbok nga nanghasi ug nanghulga sa babayeng kainom sa iyang hinigugma. Mas kuyaw kun makakita og anggulo aron makasakay sa front seat sa eskandalo sa pagbinastos, pangurakot ug pagpangilad nga gipasangil batok sa mga monghe nga nag-asul sa Lindogon, Sibonga.

* * *

Email:[email protected]