Schoking: Nakapakurat kaayo ang gibato nga mga alegasyon batok sa mga monghe didto sa Lindogon, Simala, Sibonga. Para nako, labaw pa ka shocking sa gipa-explode nga bomba ni Ping Lacson ngadtong Erap.
* * *
Di ko makaako magsubli dinhi sa mga akusasyon batok sa mga monghe kay para nako ang mga gialegar nga mga dautang buhat -- tinuod man o dili -- pulos "unfit to print."
* * *
Morag di ko katuo nga kining mga makagaba ug makauuwaw nga buhat, nga gialegar batok sa mga monghe mahitabo, kun nahitabo, sud sa bay sa Mahal nga Birhen. Grabe ka grabe.
* * *
Kana hinuong giingon nila nga pagpamaligya og mga religious articles nga perteng mahala dili kaayo kana bug-at nga sa'a para nako. Kay kun tinuod nga mahal, wa man pugsa ang gimahalan sa pagpalit.
* * *
Bisan didto sa Lourdes, Fatima, Medjugorge, Roma, ug uban pang mga dapit nga kasagaran bisitahan sa mga pilgrim ug turista, ang presyo sa mga religious souvenirs -- rosaryohan, estampita, eskapularyo, medalya, balasahon, tubig, bronda, panyo, ug uban pa, grabe sang mahala.
* * *
Apan walay pilgrim o turista ang nadunggan nga mireklamo sa kamahal niining mga butanga tungod kay ilang giisip nga ang ilang gibayad donasyon ngadto sa Simbahan.
* * *
Pero ang ubang mga alegasyon o pasangil nga kuno binuhatan sa mga monghe, di lang ko mohikap niana. Maghuwat lang ko sa resulta sa imbestigasyon nga himoon sa Archdiocese ubos ni His Eminence Ricardo Cardinal Vidal.
* * *
Klarohon ta: Si Mama Mary walay labot niining gibalitang eskandalo. Busa padayon ang atong pangaliya ngadto Kaniya ug pagduaw sa iyang milagrosong imahen sa Lindogon.