Usik-usik lang sa sweldo

Unsay kapuslanan sa pagkuha nato og consultant sa City Hall kun ang ilang mga sugyot dili lang tagdon? Dili ba kini usa lang ka pag-usik-usik sa kwarta sa katawhan gikan sa buhis nga gibayad kanila?

Mao kini ang pangutana nako sa mga opisyal sa City Hall kay karon na lang sila mihimo’g lakang nga patak-opan ang Bakak Resto Bar kay kuno walay business permit ug namaligya og ilimnon sa mga minor de-edad.

Dugay na nako kini nga gi-take up dinhi sa atong lindog ug gisuwat sa akong news articles sa The Freeman human nako mabasa ang report ni Frederick Rivera, ang consultant for revenue generation sa City Hall.

Ang accomplishment reports ni Rivera nga gisuporta alang sa renewal sa iyang pagka consultant gipirmahan ni Mayor Tomas Osmeña. Isip reporter sa City Hall mobasa g’yod ko sa mga dukomento nga isumiter sa konseho.

Ayaw ko’g ingna nga kamong mga opisyal sa City Hall wala mo makabasa sa report ni Rivera? Gibutang sa report nga ang Bakak Resto Bar namaligya kini og ilimnong makahubog duol sa University of San Carlos.

Ang City Ordinance 1413 kon liquor ordinance sa dakbayan nagdili sa pagpamaligya og ilimnong makahubog diha duol sa mga tunghaan, public plaza, ospital ug simbahan.

Kun ang baligyaanan anaa mahimutang sulod sa 100 ka metros gikan sa maong mga “prohibited area” mahimo lang sila nga katugotan sa ilang operasyon kun may “special permit” sa mayor ug mobayad sila’g P6,000 matag tuig.

Usa kini sa akong giingon nga kun abtik lang ang atong mga tax inspectors datu kaayo ang dakbayan ug dili kini maglisud sa iyang mga gastohan sa lainlaing mga proyekto.

Apan unsaon, ang ubang mga tax collectors mora’g ulod kun molihok. Karon, gigukod na sa City Hall ang Bakak Resto-bar kay diha man nahubog ang uyab sa anak ni Mayor Tomas Osmeña.

Unsa, nagkinahanglan pa ba diay nga ang tanang imnanan nga walay permit ug milapas sa City Ordinance 1413 adtoon sa uyab sa anak sa mayor aron siya maghubog, sa tumong nga matak-opan?

Kamong mga opisyal ug mga kawani sa City Hall nga mga ligoy maayo lang mo’ng panaktakon sa serbisyo. Gausik-usik lang mo sa kwarta gikan sa buhis sa katawhan.

* * *

Maayo kay kadtong uban sa mga kawani sa Cebu City Hall nga walay klarong trabaho ug anha ra manigarilyo sa “lobby” nakabasa diay sa akong lindog.

Nindot unta kun kining maong mga kawani nga utro pa nga nag-usik-usik sa sweldo nga gibayad kanila, mobati na unta og kauwaw sa mga magbubuhis.

Maayong masayod kamo nga daghang mga mata nga nagtan-aw kaninyo nga walay mga klarong trabaho. Bisan ang mga kauban ninyo diha sa City Hall nagbagolbol kay sigi ra mo’g suroy-suroy.

Hagit nako ni Acting Mayor Michael Rama tan-awa kining maong mga kawani nga walay klarong trabaho diha sa City Hall. Kun wala sila'y trabaho taktakon god!

Unya, duna gihapo’y mga kawani sa City Hall nga masugatan nako nga nagsuroy-suroy sa lainlaing dapit bisan panahon sa “office hours” unya wala magsul-ob og ID.

Klaro kaayo nga gituyo aron dili sila masakpan nga naglakwatsa. Dili ba? Sayonan ka nga ang uban, moadto sa tunghaan kay magkuha sa ilang mga anak, mangompra sa mga department stores.

May lagda nga gipatuman nga ang mga kawani magsul-ob g’yod og ID, apan karon nabantayan nako nga ang ubang kawani, naa ra sa bulsa gitagoan aron dili sila mailhan nga kawani sa City Hall samtang mag-standby sa lobby.