Money, machinery, popularity

Mao kini karon ang gikinahanglan kun buot kang mudaog sa eleksyon. Kinahanglan magkuyog ang tulo. Kun popular ka lang, apan walay daghang kwarta ug dili maka-put up og well-oiled campaign machinery, ayaw na la'g tuga-tuga'g lansar.

Gumikan niini, dili qualification ang gikinahanglan, dili ang imong sincerity ug dedication to service, dili gani ang imong pagka-honest ang mahinungdanon aron ka mudaog sa eleksyon. Kwarta. 

Hinoon, in fairness sa ato karong pumipili, sumala sa resulta sa miaging national election, daghan kaayong mga kandidato, nga walay money, walay machinery ug walay igong popularity, sama kang Trillanes, ang midaug sa eleksyon, samtang kadtong daghan og kwarta, subra ang makinarya, ug hilabihan ka popular, sama kanila ni Pichay, Singson ug Defensor, ang nangaparot.

Naghulagway kini sa pagka-edukado ug pagka-responsible na sa ato karong elector, nga suhito na sa mga isyo, ug dili na madala sa money, machinery ug popularity. Mao kini ang angayan bantayan nila ni Pichay, Singson ug Defensor (kay morag molansar na pod), ug ubang mga politiko, ilabina mga administration hopefuls, nga ang lungsod karon, na-leksyon na, dili na magpasagad sa ilang pagpili sa buot mamunoan.

Sa ato pa, dili na malingla ang lungsod. Isyo na karon ang gibantayan sa mga pumipili. Pananglitan, tungod lang kay manghatag kag libre nga lungon, qualified na kang mag-Congressman ? Ug tungod kay nakauna kag panghatag og lungon kay sa Mayor, dili na mo-qualify ang Mayor mahimong Congressman ? Mao ba kini ang mentality sa tal ug mabuot nga Sugbuanon ?

Ako pananglitan, bisan og Cebu City resident na ko (usa na gani ko sa nakadawat sa P2,000 cash assistance gikan sa city hall), apan tungod kay ang dugo ni Lapulapu nga matud nila, tingalig akong great, great apohan, naglatay man sa akong kaugatan, concern gihapon ko sa kahimtang sa isla kong natawhan, ug dili ko buot nga ang money, machinery, ug popularity sa mga kandidato nga dili tal taga-Opon, maoy mo-prevail karong 2010 election.

Busa, lungsod, suwayan kono nato nga magbinuotan kitang tanan karong eleksyona. Alang nako, kun mao gihapoy mo-prevail ang money, money, ug money karong eleksyona, wa nay paglaum kining atong nasud.

Nga kun for sale gihapon ang atong mga boto, ug kun ang atong mga kandidato mo-resort gihapon to vote buying and cheating, unsa pa may atong mapaabot nga kaayohan niining nasura? Ug ikaw, lungsod, ang sad-an niining tanan, dili sila!