Nindot ang epekto niining pagkontra na ni Senador Panfilo Lacson sa iyang “boss” kaniadto nga si kanhi presidente Joseph Ejercito nga naila g’yod sa ngalan nga “Joseph Estrada.”
Pinaagi niini, mahibaw-an sa katawhan unsay mga tinuod nga panghitabo sa atong nasud atul sa pagdumala ni Estrada.
Motoo ko sa gibutyag ni Lacson nga iyang gibulgar didto sa senado kaniadtong miaging hapon. Aw, anaa ra ninyo og dili kamo motoo.
Ang nindot g’yod kun dili unta maglipod-lipod si Lacson pagtug-an sa mahinungdanong kasayuran kabahin sa pagpatay ni Bobby Dacer ug sa iyang drayber.
Na hala, paabuton nato ang laing “privilege speech” karong Lunes. Sigurado nga kining gibulgar ni Lacson makadaut sa tinguha ni Estrada nga molansar pagbalik isip presidente.
Aw hinoon, sigurado man g’yod nga dili siya modaug kay dunay mas ilado pa nga mga tawo nga nagtinguha nga mahimong presidente.
* * *
Uy, naghilak kuno si Provincial Board Member Juan Bolo atul sa ilang sesyon kaniadtong Lunes!
Miinsister g’yod siya nga wala kuno siya makadawat bisan og usa “sentimo” gikan sa P98.9 milyones nga halin sa yuta sa pamilyang Balili nga gipalit sa probinsya.
Ako pa nimo Sir Juan mo-resign ka na lang pagka Board Member. Sigurado ko nga daghan sa imong mga kauban nga wala motoo nimo bisan og nagpaagas ka na sa imong luha.
Una, nganong ikaw man g’yod ang miandam sa mga papeles sa pagbaligya sa yuta nga dili man kini imong gimbuhaton? Apan sagdi lang, motoo na lang ta sa giingon ni Bolo nga wala g’yod siya makadawat og bahin.
Pastilan, pagkadawo g’yod diay sa pamilyang Balili kun mao kana kay bisan og gitabangan silang Bolo aron mahalin ang napatitulohan nila nga “dagat” wala sila mohatag og bahin. He! He!
Awhag karon sa katawhan ngadto ni Gobernador Gwen Garcia aron motoo sila nga wala siya makadawat og bahin sa halin sa yuta, bawia ang inyong gibayad. Grabe kamakauuwaw niining maong transaksyon.
Tiaw mo, gitataw na g’yod sa Department of Environment and Natural Resources (DENR) nga 20 sa 25 hektareya nga yuta sa mga Balili nga gipalit sa probinsya, anaa ilawom sa dagat.
Hagiton nato si Bolo nga iyang sundon ang gihimo ni Lacson. Kun tinuod man ang giingon nimo nga wala ka makadawat og bahin, itug-an ang imong nahibaw-an! Ayaw paghilak-hilak nga daw sama ka sa batang walay buot.
* * *
Wala g’yoy gipili ang mga lamok nga nagdala’g dengue virus. Bisan ang anak sa kauban namo sa media gipaak og namatay g’yod tawon. Mao na nga sa among balay, bisan mahal ang spray nga pangpatay sa mga lamok, mapugos g’yod tawon ko. Kun matan-aw ninyo nga daghan nang lamok sa inyong balay, bombahi sa panahon nga molakaw na mo.
Inigbalik ninyo, sigurado ko nga patay na ang mga lamok. Kun dili kalikayan og mahilantan ang inyong mga anak, dad-a dayon sa doktor nga dili na huwaton ang tulo ka adlaw.
* * *
Karong Sabado, ang Kapisanan ng mga Broadkaster ng Pilipinas (KBP) mopasiugda og seminar kabahin sa maayong pagpahigayon og “coverage” sa eleksyon. Tambong mo mga kauban nako sa media.
Ako gani mora’g motambong ko niini isip preparatory sa pagtambong nako sa mas daku pa nga susamang seminar nga adto ipahigayon sa Cagayan de Oro unya sa Oktobre 19 ngadto sa 21.