Panguwarta'g pamolitikasa Mandaue City Hall

Grabe na kainit sa politika sa dakbayan sa Mandaue. Nagkinihaay ang isi’g ka habig.

Samtang si Bise Mayor Carlo Fortuna gisumbongan sa mga residente sa Umapad, Mandaue kay gipanghatagan lamang og kinanipsan nga sin ug dunot nga mga plywood sa Mandaue City Hall, si Atty. Francisco Amit sa Mayor’s Management Team ni Mayor Jonas Cortes mibahad pagpasaka og kasong malversation tungod sa pagpunay niini og kolekta og transportation allowance bisan gidestinohan na kini og Starex van.

Kining pagpang-apod-apod og mga substandard nga mga construction materials sa Umapad angayan susihon sa Commission on Audit tungod kay gawas nga grabe ka-“overpriced,” mga nipis pa gyud ug dunoton.

Sobra katikasan!

Dili katuohan ang pangangkon ni Mandaue City Social Welfare Officer Violeta Cavada nga ang tanang construction materials nga gipang-apod-apod ngadto sa mga residente sa Umapad nagkantidad og P9,670 o hapit P10 mil.

Nagtuo tingale ang mga tawo ni Mayor Jonas Cortes nga walay nasayod sa tinuoray nga presyo sa construction materials.

Bag-o pa ko nagpa-renovate sa akong balay sa Meadowland Subdivision sa Pakigne, Minglanilla, busa kabisado kaayo nako ang mga presyo sa sin ug plywood (Marine o ordinary). Nasayod nang mga kawani sa Centennial Hardware sa Tabunok pila kabuok GI sheets ug Marine ug ordinary plywood nga akong nakompra sa maong hardware.

Tan-awa ninyo: miingon si Cavada nga ang plywood nga gauge 26 nagbalor og P395 samtang ang corrugated GI sheets nga gamiton pang-atop nagkantidad og P495.

Wala ka malipong, Ms. Cavada?

Ang plywood nga nakita sa TV footage hilabihang kadunoton unya P395 ang usa? Sa pagkatinuod, ang ordinary plywood nga kinanipsan nagbalor lamang og P170, samtang ang Marine plywood nga kinanipsan P210 ngadto sa P230. Ang kinanipsan sa plywood adunay gibag-on nga 1/8” ug sunod niini ang 3/16” nga tag-P270 ngadto sa P285, ug adunay 1/4” (tag P290 ngadto sa P310) hangtod na sa baga-baga nga 1/2" (P330) ug kinabag-an nga 3/4" (P350 ngadto sa P380).

Unsa man nang gipanghatag sa Mandaue City Hall, kinabag-an ba na kay nagbalor man og P395 sumala sa pangangkon ni Cavada?

Ang sin sa pagkakaron dili na sama kaniadto ang gibag-on, sumala sa akong higala nga si Edwin sa Centennial Hardware sa Tabunok. (Sa akong nahibaw-an, mao kini ang kinabaratohan nga hardware sa south area).

Ang corrugated GI sheet nga gauge 24 nga 8” ang gitas-on mapalit og P304 ug ang 6” sa tag-P228 tungod kay P38 ang kada linear foot niini; samtang ang gauge 26 nga 8” mapalit lamang og P200 kada usa ug ang 6” sa tag-P150; ang gauge 31 nga kinanipsan mapalit lamang og P176 ang 8” ug P132 ang 6”.

Hain man nga gauge ang gipang-apod-apod sa Mandaue City Hall ngadto sa mga taga-Umapad?

Ibutang nato og kinabag-an ang gipanghatag, pero ang presyo niini P304 nga hilabihan kalayo sa pangangkon ni Cavada nga P495.

Hilabihan kadako sa overprice! Walay plywood nga kinanipsan ug dunot nga nagkantidad og P395, samtang walay corrugated GI sheet nga nagbalor og P495. Bisan bisitahon pa ninyo ang Citi Hardware nga usa sa labing kinamahalan nga hardware sa Sugbo, dili motakdo ang presyo nga gihatag ni Cavada.

Kun tinuod ang pangangkon ni Amit nga mga dunot ang mga plywood nga na-deliver tungod kay wala kini mabantayi kay lagi gi-deliver kini sa dinaghan, busa maayong patubagon ang supplier niini nganong mga dunot ug wala motakdo ang presyo niini sa ilang gi-deliver.

Apan dako akong pagtuo nga adunay mga opisyal diha sa Mandaue City Hall nga nakakuwarta.

Ang maayo tingaleng tan-awon ni Amit kinsa sa iyang mga kauban ang nakakuwarta niining pagpamalit og substandard nga mga materyales nga gipanghatag didto sa Umapad.

Kinsa sa mga kauban niyang opisyal ang nakapalit og tulo ka mga luhong sakyanan ug usa ka condominium unit ang angay subayon ni Amit, kay basin og nagmata lang siya og buntag. Alkanse siya!

* * *

Maayong ipadayon ni Kapitan Glen Bercede ang iyang kiha batok ni Fortuna kun aduna kini lig-ong ebidensiya batok sa bise mayor.

Apan kun dili lig-on ang iyang ebidensiya sama sa pagkaalkanse sa gobyerno tungod sa gibuhat ni Fortuna, maayong dili na lang niya ihinayon kay basin og siya lang hinuoy masupalpal kun maklaro nga pamolitika lang ang iyang gibuhat.

Dili makiangayon kun si Fortuna padayong nagdawatan og transportation allowance bisan gidestinohan na siya og sakyanan sa kagamhanang lokal sa Mandaue.

Bisan ako maka-ingon ko nga angay siyang patubagon niini.

Pero unsa man katinuod nga gipamolitika ni Mayor Jonas Cortes hasta ang gasoline allocation? Ug mao kini ang hinungdan nga hangtod karon walay gasoline allocation si Fortuna.

Kun destinohan og sakyanan ang usa ka opisyal, siyempre apilan gyud kini og gasoline allocation. Unsaon man paggamit sa sakyanan kun walay gasolina o krudo? Maayo unta’g modagan kini bisa’g ihian ni Fortuna, dili ra ba gyud.

Usa ra gyu'y hinungdan nganong nagbuotbuot si Fortuna paggamit sa iyang transportation allowance pagpagasolina sa Starex van, ang sobrang pamolitika sa pamunoan ni Jonas nga nakapasira sa komunikasyon nilang mga opisyal sa maong siyudad.

Apan nganong si Bercede man ang pakihaon? Wala ba diay lain?

Tungod kay si Bercede ang kaatbang pagka-bise mayor ni Fortuna duna na siya'y personalidad pagkiha sa bise mayor?

Pamolitika gihapon!