Usa ka Sudanese journalist (babaye) nakonbikto sa korte didto sa Khartoum, Sudan. Ang iyang krimen? Indecency. Kay naghubo? Wa oy. Kay nagsul-ob og karsones!
* * *
So sad-an kay nag-karsones. Ang silot? Flogging - 40 lashes. Apan gipaubsan kini sa huwes ngadto lang sa multa nga $200. Tungod sa international outcry.
* * *
Pero wa mobayad ang journalist, kay matud niya unsa may naka-indecent sa karsones? Kuyawan ang iyang mga higala. Kay basig ipadayon ang flogging. Apan andam siya modawat sa flogging kun mao nay bayad sa iyang pagbarug sa iyang prinsipyo.
* * *
Dinhi sa ato, wan-a ko kakakita'g babayeng nagbistida. Pulos na nagkarsones. Gani ang akong babayeng apo nga teenager wa na makasabot sa word nga bistida. Abi ba niya'g usa kini ka matang sa bistek.
* * *
Diha toy kausa no, naglingkod ko sud sa Dinghow Dimsum ug namantay sa mga tawong nanglakaw sa Colon. Siyam sa kada napu nga babayeng akong nakita nagkarsones. Usa ka tiguwang babaye, mga 80 na tingali, nag-maong. Ang kuyog niyang batang babaye, apo tingali, nag-maong sad.
* * *
Wa baya ko manaway sa balaud sa Sudan. Mikomentaryo lang ko kay nahimuot ko sa maong balaud diin ang babayeng nagkarsones lapdosan og 40 ka higayon.
* * *
TRIVIA -- Si Lolita Dansil, taga Consolacion, Cebu, nawad-an og clutch bag diin nasu'd ang iyang mga ID ug driver's license. Duna say mga P2,000 cash. Kun kinsa man ang nakakita sa clutch bag mahimong iya nalang ang kuwarta ug bag. Ang mga ID ug driver's license lang kuhaon ni Ms. Dansil balik. Kontaka lang ang Publisher ning mantalaan.