EDITORYAL - Patyonon nga mga Pinoy

Suma pa sa usa ka kasaligan tinubdan, ang Pilipinas maoy numero uno nga nasud sa Southeast Asia sa gidaghanon og nationals nga natanggong sa mga prisohan sa China tungod sa sala nga drug trafficking kon pagpayuhot og ginadiling drugas.

Naa karoy 95 ka mga Pilipinhon nga napriso sa China, upat niini naa sa death row.

Ang Indonesia, Malaysia, Singapore ug Vietnam aduna ray 10 ngadto sa 20 ka piniriso nga nationals.

Kini bang atong mga kaigsuonang Pinoy sayod na gyud nga delikado ang pagpayuhot og drugas ug kun sila madakpan masikwate gyud, nganong himuon man gyud?

Unya ang mga pamilya dinhi sa Pilipinas magpunay yangongo pangayod tabang sa gobiyerno. Ug kun mapakyas o ba kaha balibaran sa mga nasud diin nahimo ang krimen, birahan dayon ang gobiyerno ug sakyan sab sa mga militanteng pundok.

Isilsil unta sa kagamhanan sa utok sa mga gusto motrabaho abroad ang ilang katungdanan sa pagsunod sa balaud sa mga nasud nga ilang adtoan.