Morag ipadayon gyud ang ilang Cha-cha

Niay mga headline, atong kutloon: “Palace calls for end of Cha-cha-“ Inquirer; “Palace urges House to junk con-ass,” – Philippine Star; Nindot kaayo, apan all of a sudden, ania: “Cha-cha to go on, says solon” Inquirer. Kinsa man ni nga solon? Si Rep. Danilo Suarez sa Quezon City.

Giingon dinhi nga naghuwat lang kono ang mga Malacañang Congressmen nga mokalma na ang paghisguthisgot sa pagkamatay ug paglubong ni Cory, ug lihokon na usab sa House of Gloria Allies ang Cha-cha.

Miingon si Suarez : “Her (Aquino’s) death should not stop it. After all, it will be the people who will decide if they want to change the Constitution or not.” Iksakto si Suarez. Apan, unsa may gusto sa people, Mr. Suarez?

Of course, kitang tanan gustong usbon ang Konstitusyon. Ang pangutana kun kanus-a? Kinahanglan ba gyud nga karon dayon? Kinahanglan ba nga sila rang mga Gloria Allies ang magbuotbuot paghimo sa kausaban, walay labut ang Senado, ug walay labut ang lungsod, pinaagi sa ilang Con-Ass ug dili ipaagi sa Con-Con?

Kanus-a man? Karon gyud? Ngano man? Nganong karon man gyud? Di ba ni makahuwat tapus sa 2010 election aron ang bag-o nang Presidente ang mopasiugda niini, ug bag-o nang mga Kongresista?

Gikinahanglan ang halawom nga pagtuon una nato mausab ang Konstitusyon. Dili ni mahimong dalidalion. Dili ni pareha sa paghingalan og kadalanan, nga mahimong piyungan lang ang panday sa balaud. Ug kinahanglan i-involved ang katawhan, pinaagi sa pagpili og mga tinugyanan alang sa maong katuyoan.

Dili kay ang mga Kongresista ray magbuot nga lahi man sila sa tinuyong pinili nga mga delegado, specifically pag-usab sa Konstitusyon. Ug kun ilang ipugos ang Cha-cha, nganong di man sad nila paapilon ang mga Senador? Wala bay labut ang mga Senador sa Konstitusyon? Ug mao ba kini ang gusto sa lungsod nga dili paapilon ang mga Senador? Mao ni ang gusto sa mga tawo ni Suarez sa iyang distrito sa Quezon City? Seguro ka, Mr. Congressman?

Sa mga survey, nakita nga kinahanglan mag-election gyud ta. Ug lagmit mao usab kini ang gusto ni Presidente Obama sa Amerika. Ug unya na nato usba ang Konstitusyon.

Di ba ni nato mahimo, Mr. Suarez? Unsa bay imong gidalian? Ug nganong inyo mang ipadaplin ang mga Senador? Suko ka nila ni Miriam ug Enrile, nila ni Mar Roxas, Villar ug Gordon? O di lang ka gusto moapil si Lito Lapid? Ikaw, Dro, uyon kang Suarez?