$6-B inuwi mula US hindi pala totoo

SA gitna ng batikos sa dalawang marangyang P1.75-milyon hapunan ni Gloria Arroyo sa America, tinangkang manggulat ni Press Sec. Cerge Remonde. Hoy, aniya, maliit lang ‘yang halaga ng kinain kung itutumbas sa $6.2 bilyong investments na inuwi ng Presidente mula sa US. Kesyo raw pasalubong ni Arroyo sa atin ang $136-milyong security aid, $350-milyong grant mula sa Millennium Challenge Corp., $1.6-bilyong Generalized System of Preferences 9GSP), $198-milyong bayad sa mga beteranong Pilipino, $1-bilyong garment export quota, at $1.2-bilyong bagong negosyo. Dagdag pa raw ang $1-bilyong expan­sion ng Coca Cola sa Pilipinas, na nauna nang ipinasok ang $300 milyon.

Sa pagsusuri, lumang kuwento na pala ang ilan sa mga inulat, at ang labi ay pagbibilang ng sisiw bago pa man mapisa ang itlog. Sa totoo lang:

• Ang $350-milyong Millennium grant ay hindi pa apru­bado ng Washington. Nakasalalay ito sa paglilinis ni    Arroyo ng gobyerno, na ngayo’y nabibilang sa mga pinaka-tiwali sa mundo;

• Ang $1-bilyong garment quota ay panukalang batas pa lang ni Rep. Jim McDermott nu’ng Hunyo, na tatala­kayin sa darating pang taon, at kikitain ng Pilipinas ang halaga sa 2011 kung sakaling maisabatas ito;

• Ang $198-milyong para sa mga beterano ay isina­batas sa tulong ni Barack Obama noon pang Pebrero, at halos tapos na silang bayarang lahat;

• Ang $1.6-bilyong GSP ay listahan ng 5,000 pro­duktong aangkatin ng US nang duty-free pero ni hindi nga mapunuan ng Pilipinas; at

• Ang nalalabi sa $1-bilyong expansion ng Coca Cola ay papasok sa Pilipinas limang taon pa mula ngayon.

Walang pinagkaiba sa ZTE deal ang pinagma­malaki ni Remonde na “investments” kuno. Pinala-bas nila na bagong pera raw ang $330-milyong broad­band telecoms mula China. ‘Yun pala uutangin ito ng Pilipinas sa loob ng 20 taon, at may “tongpats” pang $200 milyon o P10 bil­yon. Kikita agad ang ka­wa­tan pero dalawang deka­dang nating pagdudu­sahan.