Mas sayon nga tahas
Sugdan na sa Ombudsman karong buntag ang ilang imbistigasyon sa kontrobersiyal nga transaksiyon sa Kapitolyo uban sa pamilyang Balili diin giingong 80-porsiyento gyud ug dili lang 9.4 ektaryas sa 25 ka ektarya nga napalit sa probinsiya diha sa Barangay Tinaan, Naga ang anaa ilawom sa dagat ug katunggan.
Ang ombudsman mipatawag sa regional director sa Department of Environment and Natural Resources karong buntag alang sa usa ka conference tumong niini ang pagkompirmar sa mga dokumento nga nahipos nila maylabot sa Balili Property.
Gustong sutaon sa Ombudsman unsa gyu'y tinuod, 80-porsiyento ang ilawom sa dagat ug katunggan o 9.4 ektaryas lang sigun sa pangangkon sa Kapitolyo. Dili ni lisod ang maong tahas tungod kay magbasi tanan sa dokumento busa gilauman sa kadaghanan nga mas paspas ug dali ang paghuman sa imbistigasyon sa Ombudsman.
Mas sayon ni kaysa wa pa mahuman sa Ombudsman nga imbistigasyon hangtud karon sa kontrobersiya sa katukuran sa Cebu International Convention Center.
Alang nako dili na gani angayang lalisan pa kun pila gyud ang anaa ilawom sa tubig tungod kay “immaterial” kon way bili sa pakisusi sa Ombudsman ang gidak-on sa yuta nga naa ilawom sa tubig.
Ang pruwebahan sa Ombudsman mao lang nga alkansi ang gobyerno sa maong transaksiyon ug kining maong tahas alang nako dili na kinahanglang iprobar pa sa Ombudsman tungod kay si Gobernador Gwen Garcia mismo miangkon na nga duna gyu'y kabahin sa napalit nilang luna ang anaa ilawom sa dagat.
Madako o magamay ang kabahin sa napalit nga yuta ang anaa ilawom sa dagat tataw nga nadisbintaha ang gobyerno sa maong transaksiyon. Ang angayan nalang susihon sa Ombudsman kun duna bay mga opisyal sa Kapitolyo nga nipahimulos sa gahom aron makasapi sa maong kontrata.
* * *
Si Assistant Ombudsman Virginia Palangca Santiago mitug-an nako nga sugdan sab nila pagsuhid ang Statement of Assets, Liabilities and Networth sa mga opisyal sa Kapitolyo nga nalambigit sa transaksiyon lakip nila ni Gobernador Garcia ug Board Member Juan Bolo.
Kun gikinahanglan matud ni Santiago nga makig-alayon sila sa Anti-Money Laundering Council aron masuhid ang mga bank accounts sa mga opisyal. Dinhi masuta kinsa sa atong mga opisyal ang nagtug-an sa tinuod sa ilang mga SALN.
Kun tinud-on sa Ombudsman ang maong bahad sigurado ko nga duna gyu'y mga opisyal nga masakpang namakak sa ilang deklarasyon. Dunay opisyal nga giingong nakapalit og resort gawas sa Sugbo ug mibubo og puhonan sa usa ka bangko, masuta unya kun iya ba ning gideklarar ang maong mga kabtangan sa iyang SALN.
* * *
- Latest
- Trending
