Pagkatulin g’yod nga modagan sa panahon.
Ingon sa dili ko makatoo dihang giingnan ko sa akong kauban sa Banat News nga ang atong mantalaan magsaulog na kuno sa ika-15 ka tuig nga sumad sa iyang pagkamugna.
Tungod niadto, gilingi ko pagbalik kadtong panahon diin kami gikuhaan og sugyot kun unsay maayo nga ihingalan sa pagamugnaon nga mantalaang tabloid.
May edad na g’yod diay ko kay bisan og sa akong huna-huna bag-o pa kaayo kadto nga nahitabo, apan 15 na man diay ka tuig.
Ang tumong namo ni Beverly Lumosad, ang kanhi news editor sa The Freeman, mao nga Banat ang ihingalan sa tabloid sa Freeman aron pagtataw nga walay “birada” g’yod kun dunay anomaliya.
Daghan sa mga bag-ong reporters sa Banat News nga wala masayod niini ug mao nga angay’ng mosugod na sila sa paghimo og mga report nga magbutyag sa kahiwian sa kagamhanan.
Kaniadto, ang Banat nagmantala og mga hitabo nga “katoohan-dili.” Sukwahi sa pamahayag sa usa ka maglilindog, ang akong ngalan maoy nagbansiwag sa unang mga adlaw sa Banat.
Gisuwat nako kaniadto ang mga estorya kabahin sa usa ka langob didto sa among dapit sa Lambusan, San Remigio nga gipuy-an sa mga engkanto nga mopahuwam og gamit alang sa kasal.
Igo ka lang mosulti atubangan sa langob kun unsay imong huwaman, unya inigbalik nimo inigka-ugma sa buntag, naa na ang mga butang nga buot nimo huwaman.
Ang langob anaa pa karon nga dunay presko nga tubig daw linaw sa sulod nga maoy gikuhaan karon og suplay sa tubig-mainom sa mga nagpuyo sa Lambusan ug silingan nga dapit.
Laing mga tampo nako mao ang kabahin sa bata nga namatay, apan nabuhi, ug hangtud karon padayon pa gani nga nagtikaw-tikaw didto sa barangay Anonang Norte, Bogo, Cebu. Tiguwang na noon.
May tampo pa ko nga kabahin sa usa ka tinun-an sa pagka doktor nga gibiyaan sa iyang asawa kay nahadlok sa iyang gihimo nga “naglata” og tawo nga gipabukalan niya’g tubig sulod sa baril.
Ang doktor gusto lang nga mahuswa ang mga unod sa patay aron gamiton niya ang bukog nga eksperimentohan, kay gusto man siya nga mag-espesyalista sa bukog.
Mga pahalipay nako ni Sir Juanito Jabat, Sir Dodong ug Sir Jiji Gullas nga maoy mihukom nga umolon kaniadto ang Banat, diin karon usa ako sa mga maglilindog.
* * *
Karong gabii ba, dunay usa ka “exhibition” sa mga basketbolista nga mga bakul. Moduwa sila’g basketball nga magsakay og wheel chair.
Kun gusto kamo nga malingaw, hala adto kamo sa basketball court sa barangay Cogon-Pardo karong gabii. Tag P10 ra ang bayad sa mga motan-aw.
Si Jojo Pimentel, ang presidente sa Cebu City Federation of People with Disabilities, maoy naninguha nga mapahigayon ang maong makalingaw nga talan-awon.
Giawhag ni Jojo kadtong mga tawo nga gustong moimbitar kanila aron mopasundayag atul ba kaha sa mga fiesta, tawga lang siya sa barangay hall sa Cogon-Pardo.
Kaniadto, nakakita ko’g exhibition sa mga tawo nga magbasketball nga magsakay og bisikleta nga usa ra’y ligid. Lainlain pa ang gitas-on.
Duna pay bisikleta nga hapit motupong sa “goal.” Wala g’yoy nangatumba. Lingaw kaayo ko ug dili g’yod makalimot niadto.