Pasagdi ang Ombudsman
Angayang pasagdan ni Gobernador Gwen Garcia ang buhatan sa Ombudsman nga maoy mohimo sa fact-finding investigation ug mosusi kinsay angayang manubag sa bulilyaso pagpalit sa luna sa pamilyang Balili didto sa Tinaan, Naga aron kalikayan ang pagduda nga buot niyang lawgawon ang resulta sa pakisusi.
Mosugot siya og sa dili wa gyuy kridibilidad ang komitiba nga iyang giumol aron paghimo sa fact-finding. Kini tungod kay siya maoy nagpili sa mga sakop niini ug siya kabahin sa mga tawo nga angayang imbistigahon.
Bisan pa og ang mangulo sa komitiba mao ang regional director sa National Bureau of Investigation dili ni makapapas sa pagtahap nga panglawgaw maoy tumong sa imbistigasyon.
Alang nako naka-tsamba si kanhi Senador Sonny Osmeña niining maong isyu dihang iyang gihulagway nga ang paglakip sa NBI sa fact-finding committee sa Kapitolyo maisip nga “deodorizer” kon pagpahumot lang.
Kinsa man tinuoy motuo, bisan pa og husto ang ilang findings unya, kun ang nagsugo nila pag-imbistigar kabahin sab sa mga angayang imbistigahon? Makaako kaha ang mga sakop sa komitiba nga giumol sa gobernador pagtulisok niya nga nagkuwang siya sa iyang obligasyon pagsiguro nga way sami ang transaksiyon.
Niangkon nang daan ang gobernador sa iyang sipyat, gani nangayo na siya og pasaylo sa mga Sugboanon. Duna kahay kaisog ang mga sakop sa komitiba nga ilakip siya pagrekumendar nga pasakaan og kaso?
Kun akoy De Lemos di ko modawat niining maong tahas gawas kun mga sakop sa NBI tanan maoy maglangkob sa komitiba tungod kay mawad-an siya og apil sa kridibilidad.
* * *
Maayo sab tingali nga barugan nalang sa gobernador ang iyang pag-angkon og responsibilidad ug mohunong na pagpangita og kinsay iyang mabasol sa bulilyaso tungod kay mosamot lang ang kalagot sa publiko.
Pananglitan gibasol ni Garcia ang Department of Environment and Natural Resources tungod kay wa kuno mopahibawo niya nga ang dakong bahin sa gipalit nilang yuta gitinguha diay nga kanselahon ang titulo tungod kay dagat ug katunggan.
Mogawas ang kataw-anan paminawon ang gobernador niini sanglit dili man intawon ni obligasyon sa DENR ang pagpahibawo niya. Iyang obligasyon ang pagsusi kun wa bay problema ang yuta nga gustong paliton sa probinsiya.
Kun duna may mabasol niini way lain ang probinsiya tungod kay nagdanghag ni ug wa himoa ang survey nga maoy sagad buhaton sa mga mopalit og yuta sa wala pa bayri.
Kun gi-survey pang daan nahibaw-an unta nga duna diay bahin niini nga dagat ug pagatpatan.
* * *
- Latest
- Trending
