EDITORYAL - Mapapas na kaha ang Abu Sayyaf

Human sa dugoong panag-engkwentro tali sa mga sundawo sa kagamhanan ug sa Abu Sayyaf diin 28 ka mga Marines ang nangamatay, si Presidente Gloria Macapagal Arroyo mimando og “rapid annihilation” kon paspas nga pagpapas sa Abu.

Mao kini ang gusto sa katawhan -- nga maimpas ug mapapas na kining maong mga teroristang Moros ug ang armadong kusog sa nasud andam motuman sa kamandoan sa ilang commander in chief.

Daghan nang mga presidential order susama niini. Nga tiwasan na ang Abu Sayyaf sa atong militar. Apan nganong kalit lang hunongon ang opensiba kun mapiit na ang kontra?

Kahinumdoman nga si Presidente Erap Estrada mimando og all-out war batok sa Abu Sayyaf apan wala matiwas ang “all-out war” ug nakalingkawas ang mga terorista.

Hinaut unta nga ning pagmando ni Arroyo nga ilusad ang “rapid annihilation” ma-annihilate na gyud ang Abus. Tan-awon ta.