Panihapon ni Gloria

Naukay ang tanan sa minilyon ka pesos nga kantidad sa panihapon ni Presidente Arroyo sa Amerika. Sa duha ka managlahi nga kan-anan giingong nigasto ang grupo sa presidente og kapin sa usa ka milyon. Daling naputos sa pagsaway ang maong panihapon tungod kay di' makatuo ang kadaghanan nga naka-ako ang grupo sa presidente sa pagkaon sa usa ka mahalong restaurant samtang nagkamang sa kalisud ang minilyon ka mga Pilipino. Paspas nga giangkon sa Malacañang ang balita nga unang gipabuto sa mga dagkong mantalaan sa Amerika. 

Depensa sa buhatan sa presidente, gilibre ang panihapon sa usa ka suod nga higala ug walay bisan usa ka dako nga gigasto ang gobiyerno alang sa maong panihapon. Giklaro sa Malacañang , wa'y plano ang presidente nga mogasto sa ingon niadto ka dakong kantidad sa usa lang ka panihapon.   Nakalimtan sa Malacañang sa pagbutyag unsay gipangayong bawos sa mga tawo nga nang libre sa grupo sa presidente. Kun imong tan-awon pag-ayo, wa'y tawo nga mopagawas og ingon niadto ka dakong kantidad alang sa usa ka panihapon kun wa' siya'y makuhang bawos. Posible 'sab nga nanglibre siya isip pasalamat sa bisan unsa man nga pabor nga nahatag na sa iyaha sa Malacañang.   Bisan siguro suod nimong higala nga manglibre og minilyon ka pesos nga kantidad sa panihapon, magduda naka kun kinasing-kasing pa ba ang iyang gibuhat nimo o may dakong bugti siyang pangayuon.

Di' nato ibuhos ang tanang pagbasol sa mga tawo nga nanglibre apan sa grupo gyud sa presidente. Aron di' na mabahiran sa mga pagduda ug daghang kontrobersiya, ngano paman nga modawat og ingon niadto ka mahalong pabor? Di' na gyud hinuon mapapas sa huna-huna sa mga tawo nga naanad na ang administrasyon sa pagdawat og mga gasa nga wa' ta mahibawo unsa ang gipangayo isip bugti. Kun may delikadesa ug respeto sa ilang dungog ang grupo sa presidente, nganong gidawat paman ang dakong pabor? 

Kun usa ka tawo nga maglikay nga mabahiran og daghang mga pagduda ang mga pabor nga imong gidawat, wa' nalang nimo suwayi ni sa pagdawat. Karon, sa minilyon ka pesos nga panihapon nga giangkon sa Malacañang, di' halayo ang posibilidad nga tinuod 'sab ang isyu sa ZTE-NBN deal nga matud pa, nakapangayo 'sab og dakong pabor ang grupo sa presidente.Tungod sa pagpalibre ni Presidente Gloria sa panihapon sa Amerika, di' halayo nga may daghan pang nanglibre kaniya kaniadto.

Ang biyahe lang sa Amerika ning bag-o ang nabulgar nga nidawat og libreng imbitasyon sa usa ka suod nga higala.   Di' gyud halayo nga sa kadaghan sa mga lugar nga gibisita sa presidente sa bisan asang bahin sa kalibutan, may mga tawo 'sab nga nanglibre sa iyang grupo. May bawos man nga gipangayo o wa', di' na mahinungdanon. Ang mahinungdanon, isip usa ka dakong opisyal sa gobiyerno, makamao kang manalipod sa imong dungog aron di' ni mabahiran sa bisan unsang mga pagduda. Naanad nalang gyud siguro ang presidente nga gibuling-bulingan ang iyang panga'n. Hinuon, unsa pa may wa' niya matilawi nga matang sa pagbungkag sa dungog kun iyang nalagpasan ang isyu sa pagpanikas sa miaging eleksyon?

Depensa sa Malacañang, isip usa ka 'head of state', katungod sa presidente ang mokaon sa usa ka sikat ug mahalon nga kan-anan. Makapabalaka ang maong pahayag basin maabusohan sa presidente. Wa' pa ba 'ta motagam sa panahon ni Imelda Marcos nga pirting pagpanimpas sa katigayonan sa nasud kay buot ipakita sa kalibutan nga adunahan ang Pilipinas? Wa' kinahanglana nga mokaon ang presidente sa usa ka sikat o mahalong restaurant o sa usa ka simple ug baratuhon nga kan-anan, ang gipangayo lang sa mga tawo, gamay nga simpatiya sa nagkalisud nga mga Pilipino.

* * *

Email: [email protected]