Ang gubot ni Gibo ug si Ponso Pilato sa Kapitolyo

Sa dihang kalit nga gitunolan ni Atty. Antonio Oposa Jr. sa mikropono aron pasulti-on sa mga mahigugmaon sa kinaiyahan nga nagtapok kaniadtong Biyernes didto sa Cebu Sports Club kalit lang nahilom ang tanan. Gihangyo ni Defense Secretary Gilbert “Gibo” Teodoro ang tanan sa paglitok sa hilom og pipila ka pulong sa pag-ampo alang sa 23 ka mga sundawo nga namatay tungod sa pagpakigpinusilay niini sa mga sakop sa Abu Sayyaf ug Moro Islamic Liberation Front.

Human sa mobo nga pag-ampo, miyango-yango sa ilang mga ulo ang mga mahigugmaon sa kinaiyahan agi og timaan sa ilang pag-uyon sa gipamulong ni Gibo. Matud pa sa batan-ong defense secretary, ang gubat sa umaabot dili na gubat sa armas kun dili gubat na sa kakuwang sa tubig, kakuwang sa kahoy, kakuwang sa isda, kakuwang sa pagkaon ug uban pa tungod kini sa pagpabaya ug pag-abuso sa uban sa atong kinaiyahan.
Maayo pa si Gibo nagtagad sa kahimtang sa atong kinaiyahan ug mihimo nag lakang aron kini kapanalipdan. Naay uban diha kutob ras pagpagarpar.

Ang kahimtang sa atong kinaiyahan kinahanglang dili ibaliwala tungod kay naa kita dinhi mabuhi ug naa kita dinhi magpuyo. Busa ato kining hikutaron ug atimanon. Sa imong pagpabaya wa lang ka maghikog sa imong kaugalingon, gihikawan mo usab ang bag-o ug ang umaabot pang henerasyon.

Kun gipanagan-an na ni Gibo ug sa ubang mga nagmahal sa kinaiyahan ang gubat sa umaabot, kamo, ikaw, di ka ba mouban kanamo?

* * *

Human nag ala Gloria kay nag “I am sorry”, nag Ponso Pilato na usab si Gobernadora Gwendolyn Garcia. Kining tanan tungod sa Balili property sa lungsod sa Naga nga gipalit sa Kapitolyo ug hapit muabot sa usa ka gatos ka milyon ka pesos nga ang sobra diay sa katunga niini dagat.

Gitukmod karon sa gobernadora ang responsibilidad ngadto kang bokal Juan Bolo kinsa matud pa maoy nangusog aron mahimo ang palit sa yuta nga gipanag-iya sa mga Balili. Wa kuno’y labot si Gobernador. Motoo mo? Magpadektar lang diay ning atong gobernador ni Juan Bolo? Pagkatoytoy! Kinsa ba diay ang gobernador sa lalawigan sa Sugbo, si Juan Bolo? Hain na man ang pangugat sa sipsip nga si Rory John Sepulveda nga nag I am sorry ug nag Ponso Pilato naman ang gobernadora? Are you still there torney?