Bayaning marikit

Sa dami ng taong sumaksi sa libing

pangalan ni Cory lalong nagluningning;

pati mga taong kaaway na lihim

nakisimpatiya’t nagsipagpugay din!

Ito ang nadama nitong buong bayan

nang si Tita Cory dalhin sa himlayan;

doon ay nakita nitong sambayanan –

ang taong disente’y pinagpupugayan!

Sa Metro Manila’t maging sa probins’ya

ang ngalan ni Cory at buong pamilya –

naging bukambibig sa loob ng bansa

at maging sa abroad sila’y dinakila!

Ang mga ginawa ng dating pangulo

ay batid na ngayon ng lahat ng tao;

siya ay naglider – Diyos ang kasalo

kaya laging tumpak ginagawa nito!

Ang kabayanihan ay nakikilala

sa mga nagawa kung siya’y patay na;

katulad ng kanyang butihing asawa

hindi pa bayani nang siya’y buhay pa!

Si Ninoy kung kaya bayani na ngayon

siya ay pinaslang ng kaaway noon;

nang siya’y barilin sa mabuting layon

itong buong bsnsa’y gumanti’t nagbangon!

Ah ganyang-ganyan din nangyari kay Cory

sa kanyang gawain ay kapuri-puri;

Saka nakilala at ngayo’y bayani

Sa mga ginawang nagtampok sa lahi!

Siya ay pangulong matapat sa misyon

At hindi nag-imbot sa kanyang posisyon;

Kaya nang yumaong wala sa panahon

Tumangis – nagluksa itong buong nasyon!

Dahil sa pangulo na sobra ang bait

Sa mga kasma’y hindi nagmalabis;

Pamilya at bayan laging nasa isip

Kaya nang masawi’y Bayaning Marikit!