Pagkadakong milagro nga nahimo ni Mayor Jonas Cortes sa dakbayan sa Mandaue!
Si Jonas nakadawat og award tungod sa iyang “strong political will in implementing the environmental law on solid waste management.” Pakpaki ninyo!
Sa press release gikan sa Mandaue City Hall nga gipatik sa The Freeman kagahapon, ang award ni Jonas gihatag sa 888 Forum tungod kay napatuman niya ang Ecological Solid Waste Management Act of 2000 (RA 9003) sulod lang sa “duha ka bulan” human niya gisirad-an ang dumping site sa Umapad niadtong Hunyo 5.
Sa press release, kini nagkanayon nga 25 sa 27 ka barangay sa Mandaue ang nakapatuman sa hingpit sa waste segregation ug mi-reduce og katunga sa 200 ka toneladang basura sa Mandaue kada adlaw.
Kuyawa ah! Kapaspas baya! Duha lang ka bulan human na!
Ang dakbayan sa Lapulapu nakahimo pagpakubos sa 140-toneladang basura ngadto sa 100-tonelada kada adlaw sulod sa tulo ka tuig.
Si Jonas miduaw sa dumping site sa barangay Mactan pipila ka adlaw sa wala pa niya sirad-i ang Umapad dump site ug ang material recovery facility (MRF) niini. Busa nasayod siya nga dili sayon ang pagpatuman sa maong proyekto.
Kun tulo ka tuig sa Lapulapu, ang Palawan nagmalampuson sa ilang segregation program human sa lima ka tuig. Lima ka tuig! Pero sa Mandaue, duha ra ka bulan.
Klaroha intawon na ninyo!
Unsa man kining reklamo sa Department of Environment and Natural Resources (DENR) nga human ninyo sirad-i ang Umapad dump site tungod lagi kay mao kini ang nakita ninyong sulbad sa suliran sa basura sa Mandaue, apan sa pagkakaron nag-open dumping gihapon mo?
Unsa man nang open dumping sa Subangdaku? Mao nay gitawag ninyo og material recovery facility o material dumping facility?
Ang nakit-an ninyong sulbad sa problema mas labaw pa’ng problema.
Pag-sure intawon mo! Klaroha intawon na ninyo uy. Naa ba guy segregation program nga ma-fully implemented sulod lang sa duha ka bulan?
Giunsa man ninyo pagpatuman niini sulod sa duha ka bulan nga wala man gani klarong MRF ang Mandaue ug nangawala na ang mga garbage bin nga alang unta sa pagbulag sa mga malata ug dili malata ug kadtong mahimo pa ma-recycle.
Nahisgotan man nato ang garbage bin, hain na man diay kadtong mga imported nga mga garbage bin nga gipamalit atol sa administrasyon ni Mayor Thadeo Ouano?
Nganong wala man kadto panggamita aron katuhoan nang ilang pasiatab nga duha ka bulan lang fully implemented na ang waste segregation program sa Mandaue?
Naglibog gyud ko unsa nga klaseng political will ang gigamit ni Jonas nga sulod lang sa duha ka bulan “fully implemented” na ang iyang waste segregation program. Sa ato pa, napilde niya ang Lapulapu, Cebu City nga hangtod karon walay klarong solid waste management program kay ang mayor utrong nagka-wala nay klaro, ug ang Palawan nga ang ilang mga lider hilabihan ka-strong ang political will.
Kamong mga Mandauehanon, motuo mo anang PR sa Mandaue City Hall nga “fully implemented” na ang solid waste management program nila?
Wala na mo kakita’g basura diha sa inyong tungod?
Hala kadtong mosupak, palihug ko og text sa 0915-7817491 aron atong mapakita ang tinuoray nga sitwasyon sa basura sa Mandaue.
* * *
Hapit na ang pista sa Minglanilla. Magsaulog sa ika-152 nga tinuig nga kapistahan ang Immaculate Heart of Mary Shrine karong Agosto 23.
Ang opening salvo karon adlawa (Agosto 12) sugdan kini sa Immaculate Heart of Mary Academy karong gabii isip IHMA Nights, diin ang mga tinun-an sa maong tunghaan nga gidumala sa mga Sisters of the Augustinian Recollect molingaw sa mga Minglanillahanon.
Sa Agosto 13, ipahigayon ang Miss High School Minglanilla Talents Night. Sa Agosto 14 sa buntag ang airsoft competition, samtang DepEd Night sa gabii.
Sa Agosto 15, laing airsoft competition sa buntag ug UV Minglanilla Campus Night usab sa gabii nga pagasundan og disco.
Sa Agosto 16, adlaw’ng Domingo, adunay stage play ang Minglanilla Parish Youth.
Sa Agosto 17, himuon ang grand finals ug award night sa “Search for Minglanilla Idol.” Ang mga tagdumala niini nakapili na og mga top finalists sa nangaging mga Sabado diin niadto lang Hunyo 20 gihimo ang final selection sa mga finalists.
Ang Agosto 18 nga dance showdown gihinganlan kini og “Minglanilla Dance Explosion” nga usa ka open category ug inter-town dance competition.
Apan mao lagi, duna silay Miss Gay Minglanilla sa Agosto 19.
Si Ruffa Mae Quinto ug Andrew E. gikatakdang mobisita sa lungsod alang sa Fan’s day niini sa Agosto 20.
Himuon ang Miss High School Minglanilla pageant and coronation night sa Agosto 21. Sa Agosto 22 himuon ang “Walk Barbie Walk” ug sa Agosto 22 ang “Back-to-Back Disco”
Sa Agosto 23 sa gabii sa kapistahan himuon ang “Kalinaw sa Minglanilla Taebo Fiesta Parade” ug ang “Bike for Peace” sa kasundalohan sa Central Command ug pagasundan sa drama sa DyHP sa gabii.
Himuon ang tanang pasundayag sa oval ground sa lungsod.