Ang pan nga gikan sa langit

Usa sa mga parokyano ang akong giingnan nga tinuod dunay pan nga gikan sa langit ug kini mao ang atong Ginoong Jesu-Kristo. Apan wala kini magpasabot nga magpaabot lamang kita kun kanus-a mahulog kining maong pan sanglit hagbay ra man siyang mianhi ug gani nahimo naman nato siyang kalan-on nga naghatag og kabaskog sa atong kalag. Bililhon alang kanato ang pagkaon. Apan ang nakapahimo niini nga mas bililhon mao man ang mga tawong nahimong mas suod sa matag higayon nga ambitan ang kalan-on. Ang atong pagkalawat sa kanunay maoy nakapahimo natong suod ngadto sa Ginoo ug hinaut unta nga mas suod pud sa mga tawo nga atong nakalambigit kay wala lang kita mokaon kondili nikaon kita aron makigsuod ug wala lang kita makigsuod kondili nakigsuod kita aron mabuhi kay ang kinabuhi usa man ka kalambigitan.