Sana naman sana hindi na maurong
Ang nakatakda nang pambansang eleksi’yon
Kung hindi ay sayang mga preparasyon
Ng ating Comelec ng gobyerno ngayon!
Naging masigasig ang ating Comelec
Maging automation ang ating pag-elect;
Kaya dapat lamang tayo ay manalig
Na tuloy na tuloy halalang nabanggit!
Kung di matutuloy ay sayang na naman
Panahon at perang dito ay nalaan;
Automation machine — mga kasangkapang
Binili ng mahal sa mga dayuhan!
Sayang din ang hangad ng maraming tao
Magbago ang takbo ng ating gobyerno;
Nais ng marami sila’y makaboto
Sa mga marangal nating kandidato!
Sana’y di totoo hula ng marami
Ang halalan ngayo’y baka niyayari
Ng mga opisyal upang manatili
Sila sa posisyon at sila ang hari!
Sa SONA ng ating butihing Pangulo
Sinasabi Niyang tuloy ang trabaho;
Tatapusin Niya ang Kanyang termino
Pero di binanggit kung kailan hihinto!
Kaya possible ring tumpak ang hinala
Ng mga kalabang di siya bababa;
Ang Con-Ass at Cha-Cha waring inihanda
Upang mga lider manatili pa nga!
Kung tama ang hula ng mga kalaban
Nasa Oposisyon walang aasahan;
Inaasam nating tuloy ang halalan
Waring bibiguin ng nasa upuan!
At ito ang challenge na dapat harapin
Ng mga kalabang gusto’y maghari rin;
Ngayon pa’y ilabas ang dunong at galing
Laban sa sistemang gustong pairalin!