Dear Dr. Elicaño, ang aking ama ay 60-years old na pero patuloy pa rin sa paninigarilyo. Hindi talaga niya maiwasan ang paninigarilyo. Lagi kong pinaalalahanan pero ayaw makinig. Lagi siyang inuubo at ang kanyang mukha ay magaspang. Totoo po bang malaking porsiyento ng Vitamin C at E ang nababawas sa isang tao kapag siya ay lulong na sa paninigarilyo? — PATRICIA CRUZ ng Malabon
Marami nang isinagawang pag-aaral na ang paninigarilyo ang dahilan ng pagkakaroon ng cancer sa baga, throat, mouth, stomach, pancreas, bladder at rectum. Ang paninigarilyo ay nagiging dahilan ng leukemia. Kalahati ng bilang ng mga naninigarilyo ay namatay dahil sa bisyong ito. Ang pinakamabuting magagawa ay sundin ang payo na huwag manigarilyo.
Natuklasan na ang mga naninigarilyo ay may malaking kakulangan sa Vitamin C. Ang Vitamin C kapag nagkulang sa katawan ay mahirap nang lumaban sa mga tinatawag na free radicals na dulot ng sigarilyo. Hindi na maaaring lumaban ang katawan sa nitrosamines – cancer forming agents na nakukuha sa nitrogen compounds ng pagkain.
Sa mga isinagawang tests sa mga naninigarilyo, nakita na 30 percent ang kakulangan nila ng Vitamin C sa kanilang dugo. Para mapunan ang kakulangan nila sa Vitamin C, dapat nilang kumunsumo ng 40-80 mg. ng Vitamin C daily. Nararapat kumain nang maraming prutas at gulay ang naninigarilyo para mapunan ang kakulangan ng Vitamin C sa katawan. Bukod sa Vitamin C, dapat ding mag-take ng Vitamin E. Ang Vitamin E ay matatagpuan sa wheat germ, avocado, vegetable oils, nuts at seeds.