Kini bitaw’ng gusto ka nga moalagad sa katawhan, angay g’yod unta nga dili ka mag-ginarboso. Unsaon, kining uban nagtoo man nga kay sila opisyal, sila g’yod maoy hawod.
Mao kini ang batasan ni Mayor Tomas Osmeña. Ang ubang reporters sa City Hall nakabantay man niini, apan dili lang sila makaharong sa pag-atake kay maikog ug mahadlok.
Birthday man g’yod karon ni Tommy, ang mensahe nako niya nga hinay-hinaya na’g usab ang imong batasan mayor.
* * *
Ingon niini ang nahitabo. Alas 10:35 sa buntag gahapon, mi-text ko niya ug mipahibalo nga motawag ko gamit ang among direct line. May ipangutana unta ko niya kabahin sa usa ka isyu. Tuod man, nakontak nako si Tommy apan pagkasayod nga ako’y mitawag, dayo’g ingon nga “busy” ug giputol dayon.
Batasan ba kana og mayor? Ibutang nato nga busy ka atul sa pagtawag nako mayor Tom, s’yaro na man pod og dili ka makaingon nga duna pa kay miting nga dili matugaw sa dili pa nimo putlon ang tawag.
Bastos kaayo ang gihimo nimo Mayor Tommy. Ang tinuod, reporter ko sa Freeman ug DyLA nga gi-assign sa City Hall, apan dili ko mahadlok nga mosaway ni bisan kinsa nga baliko og kinaiya. Ang pagka-opisyal sa kagamhanan ayaw ninyo ipasigarbo pag-ayo kay ang tinuod mga ulipon kamo sa katawhan nga maoy mipili kaninyo.
Ikaduha, ang cellphone nga gigamit nimo Mayor Tom, gipalit ug gibayran sa buhis sa katawhan apil ang tanan nimong magamit nga tawag nga “sky is the limit.”
Dihang nanawag ka nako Mayor Tom niadtong miaging Domingo kay gusto ka nga mokomentaryo sa usa ka isyu, bisan og duna ko’y gitambongang miting, mibiya ko aron lang pagtawag kanimo pagbalik kay “low power” na ang akong cellphone niadto.
Bisan og “day off” nako ang adlaw’ng Domingo nga wala na gani kami makapanimba sa akong pamilya kay nagsuwat ko sa imong gihatag nga kumentaryo sa usa ka isyu, ikaw ang akong gipalabi kay mirespito ko nimo.
Ingon ba niana ang bugti sa usa ka respito?
Ang kinabuhi sa tawo dinhi sa kalibotan lumalabay lang, mao nga dili kita magpalabi-labi og maayo sa pagtoo nga kita maoy hawod og ubos ang uban.
Tungod niining maong lindog, hayan masuko kanako si Mayor Tommy. Kana kun dili niya gamiton ang iyang sentido komon sa paghuna-huna kun nganong gisaway nako ang iyang batasan.
* * *
Angay’ng imatuod ni Tommy nga dili niya dapigan ang sakop sa Mayor’s Management Team (MMT) nga giingong nasakpan usab nga mipanso sa Daily Time Record sa kauban niyang kawani.
Nakabantay ra ba ko nga basta MMT na gani ang malambigit, lihay pang Pacquiao kini si Tommy. Dihang didto pa siya sa Houston, Texas gikuhaan nako siya og reaksyon sa usa ka isyu nga sakop sa MMT giingong nakig-relasyon og konsehal.
Unsay iyang tubag? Pinilosopo gihapon.
Matud niya, unsa kuno’y akong gusto, mopauli ba siya dinhi sa dakbayan aron imbestigahon ang pasangil ug kanselahon ang iyang scheduled nga check-up sa Estados Unidos?
Kun mahibaw-an kuno nga dili tinuod, mobalik naba usab kuno siya sa Houston, Texas aron ipadayon ang iyang check-up?
Hahay, pastilan. Nganong usahay lagi ikaw man ang mag-una-una paghatag og komentaryo Mayor Tom nga dili na kinahanglang mopauli ka?
Kun dili ka gusto nga motubag sa isyu nga naglambigit ang pinangga nimo nga sakop sa MMT, ayoha lang og pagpasabot dili kay pinilosopo.